Bowles sugod na’g ensayo uban sa KaTropa

CEBU, Philippines - Gipakita ni kanhi PBA Best Import Denzel Bowles nga seryoso siya nga motabang sa TNT KaTropa nga makasud sa finals sa sunod conference dihang sayo siya nga mianhi sa Pilipinas aron mag-ensayo uban sa maong koponan.

Si Bowles gikuha sa TNT KaTropa isip ilang import sa PBA Commissioner’s Cup.

Misaad si Bowles  nga ibuhos ang tanan niyang abilidad alang sa KaTropa, kansang damgo nga makasud sa finals sa All-Filipino Cup nabaraw human sila gipalagpot sa San Miguel Beermen.

Ang 2012 Commissioner’s Cup best import miduwa sa miaging tuig uban sa Star Hotshots, apan wala siya katiwas tungod kay wala sila magkasinabot sa management ilabi na sa kanhi coach sa Star nga si Jason Webb.

Gawas sa TNT KaTropa, ang mga koponan nga nakakuha na sa ilang tagsa-tagsa ka import alang sa sunod conference nga buksan sa hinapos

nga bahin ning bulan sa Marso mao ang Mahindra Floodbusters nga mikuha pagbalik ni James White, ang NLEX Road Warriors nga mibira sa laing ex-best import nga si Wayne Chism,  ang Phoenix Fuel Masters nga mikuha sa serbisyo  ni Jarrid Famous ug Meralco Bolts nga mikuha ni Alex Stephenson.

Wala pa makakuha og import mao ang San Miguel, Barangay Ginebra, Star ug Rain or Shine. (BANAT NEWS)