Love Story

Dear Banat News Hugyaw,

Maayong adlaw sa tanang suki sa Banat News! Ako diay si Jessa Mae, 26 years old, nagtrabaho sa bangko ug taga Mandaue City. Ipaambit diay nako ang akong katapusang lovelife nga hagbay na nga nahupas. Katapusan nako nga nauyab mao si Christopher nga nagtrabaho sa usa ka  restaurant.

Nagkaila-ila ming duha kay barkada sila sa akong classmate pag-high school. Naatol to nga birthday sa akong former classmate ug imbitado pud siya maong nagkaila mi. Pag-una lang kita namo, magsige na siya og tan-aw nako, kay dili man ko komportable , igo ra intawon ko sa pagduko.

Pag-abot sa among balay, nahibulong  ko kay dunay unknown number nga ni-text nako  og  “good night”.

Ug nagpaila dayon ang texter nga siya si Christopher, ang bag-o nako nga naila-ila sa birthday party sa akong ex-classmate, ug niana siya nga akong ex-classmate maoy naghatag sa akong number .

Niana pud siya nga na-love at first sight daw siya nako. Puwerte nako og katawa kay wa ko gadahom nga uso pa diay nang linyaha. Kay wala man ko’y lingaw, ni-reply ra pud ko sa iyang mga text, hangtod nga nagka-sweet ang iyang text nako.

Naabot sa time nga kiligon na man ko uy kun mag-text text ming duha. Sa tinuod lang, lud-on gyud ko anang textmate-textmate, Pero lahi man ang among sitwasyon, kay nagkaila-ila na man mi sa personal sa wala pa mi nag-text text busa dili tantong baduy.

Nagkasabot mi nga magkita ug nagsagunson na gyud ang among mga date.  Lami kaayo moluto si Christopher, usahay dalhan gyud ko og foods kung mobisita siya sa balay.

Naabot gyud ang panahon nga nanguyab siya kanako, siyempre ako dayon siya nga gisugot kay na-develop na man pud ko niya.

Pag-abot og tulo ka tuig sa among relasyon, nawala na man ang gana niya nako.  Hangtod nga niprangka siya nako nga dapat na mi nga magbuwag kay wala na siya’y gusto nako. Ing-ana lang kadali para niya. Naningkamot ko nga dili mi magbuwag pero mao man gyud ang iyang gusto.  Usa ka semana human sa among panagbuwag, nag-post na siya og hulagway sa FB uban sa iyang new girlfriend . Laktod pagka-istorya, naa na siya’y ka-iring iring sa dihang uyab pa mi.  Naa na siya’y reserba nga girl uy human sa among breakup, ing-ana kabaga ang iyang nawong.  Naka-move on nako sa among breakup, pero dili gyud ko kalimot sa iyang kasalbahis.  Mo-request lang ko sa lyrics ug chords sa Somebody That I Used to Know by Gotye.

Hi Jessa Mae! Thank you so much sa imong LOVE STORY! Paabuta ugma puhon ang imong request.

Dear Kalandrakasers, aduna ba kamo'y LOVE STORY? Suwata ka na ug ipadala pinaagi sa                 pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News

Corner V. Gullas and D. Jakosalem Streets

Barangay Sto. Niño  6000 Cebu City, Philippines