Softball clinic sa P. Princesa malampuson

CEBU, Philippines - Miabot ngadto sa 150 ka kabataan ang misalmot sa usa ka adlaw nga Punta Princesa softball clinic niadtong Domingo diha sa Punta Princesa Elementary School.

Ang maong kalihukan gipasiugdahan sa Punta Princesa Barangay Council for the Protection of Children (BCPC).

Ang mga bata nga mitambong sa clinic nagpangedaron gikan sa sayes anyos ngadto na sa 20 anyos. Kadaghanan nga mitambong nagpangedaron og 16 anyos, mga sakop na sa Abellana National School softball team, kinsa anaa magpuyo sa maong barangay.

Ang mga partisipante gitudloan og mga basic softball techniques lakip niini ang batting, throwing ug catching ug uban pang mga importanteng butang nga naglambigit sa papel sa pitchers ug catchers, sa fields ingon man usab ang papel sa 1st base, 2nd base ug 3rd base.

Gihisgutan sab ang papel sa short stop ug unsay angayan buhaton sa flying balls.

Niadtong wala pa masayod, ang Punta Princesa maoy pinuy-anan sa mga maayong laking softball players dinhi sa Sugbu diin ang uban kanila nahimo nang sakop sa Philippine Team nga Blu Boys. Sama ni Ben Maravilles, Darius Bacarisas, Jasper Cabrera, Roldan Bacarisas ug Manuel Bacarisas ingon man usab ang ilang head coach nga si Zaldy Bacarisas.

Ang clinic instructors naglakip nilang Dionisio Bacarisas, Rolly Bacarisas ug Wherwin Tabar.

Ang maong kalihukan gipaluyohan sab nilang Punta Princesa brgy. councilor Mae Ann Caballero-Maravilles, Chito Porcadilla ug Ray Salgado, ang chairman sa barangay professional sports. (BANAT NEWS)