M. Lhuillier midaog sa Liga Cebu pre-season

CEBU, Philippines - Milansang sa iyang crucial free throws ug mga mahinungdanong itsa si Woodrow Enriquez aron giyahan ang M. Lhuillier Kwarta Padala-Cebu Jewelers paingon ngadto sa dalan sa kadaugan batok sa bisitang MisOr Meteors, 71-61 ug ingon man pagdaog sa Cebu pre-season games title sa Smart-Liga Pilipinas kagabii diha sa nagsugwak nga Cebu Coliseum.

Sa sayo pa, ang Trace-Laguna Stallions mibuntog sa Mandaue-Cebu Landmasters sa iskor nga 86-77 aron pag-angkon sa ikatulo nga dapit ning upat ka adlaw nga kompetisyon nga magsilbeng tune-up sa Liga Pilipinas Conference 3 nga gikatakdang sugdan karong Agosto 19 diha gihapon sa Cebu Coliseum.

Si Enriquez mikulit og game-high 18 puntos, lakip na ang pito ka sunod-sunod sa katapusang kuwatro minutos sa duwa aron luwason ang Jewelers ni team owner Michel Lhuillier ug coach Raul 'Yayoy' Alcoseba gikan sa peligrosong sitwasyon.

Ang Jewelers nilabaw og 14 puntos sa makaduha ka higayon, ang katapusan sa iskor nga 48-34 sa tunga-tungang bahin sa third quarter kay ang Meteors mibawos ug nakan-an ang labaw ngadto na lang sa dos puntos human sa free throws ni Neil Rañeses sa nahabiling 1:21 sa duwa.

Apan ang Jewelers mipabuto og 9-0 run aron inaton ang labaw. Katapusang nakasikit ang Meteors sa iskor nga 61-64 sa nahabiling 2:36 sa duwa kay si Enriquez mikompleto sa iyang three-point play aron hatagan ang Lhuillier og otso puntos nga labaw, 69-61.

Ang basket ni Bruce Dacia maoy miselyado sa kadaugan.

Upat ka Jewelers ang mikulit og double figures uban ni Marlo Basco nga mitimbre og 17 puntos. Sila si Stephen Padilla ug Dacia mipupo og 12 puntos matag usa, samtang si Ariel Mepaña mitimang og 11 puntos.

Si Rañeses maoy nangulo sa MisOr pinaagi sa iyang 18 puntos, gisundan sa Sugbuanong si Patrick John Cabahug nga adunay 14 puntos.

Puntos Matag Usa

M. Lhuillier (71) – Enriquez 18, Basco 17, Dacia 12, Padilla 12, Mepaña 11, Nailon 8, Berami 7, Ababon 6
MisOr (61) – Rañeses 18, Cabahug 14, Mamaclay 9, Daja 7, Pupos 5, Moreño 4, Butel 4 . – BANAT NEWS