Bililhong Rampa ni “Tubig Queen”

CEBU, Philippines - “Never never give up, go lang nang go!”

Mao kini ang motto ni Jay Kummer S. Teberio o mas nailhan nga Dodoy, usa ka tindero og tubig  sa dalan diha sa north reclamation area duol sa SM City Cebu. Ang 21-anyos nga taga Carreta nailhan sa mga Sugbuanon gumikan  sa makalingaw niya nga estilo sa pagpamaligya og tubig.

Apan luyo sa iyag mga pahiyom ug kalipay, nagpahipi ang mga  kasakit sa kinabuhi nga angayan ipaambit aron kapanaminan sa mga kabatan-onan. Hinuon, ang nailang “Tubig Queen” hingpit na gayud nga mutapos sa iyang pagtuon. Gikatakdang mogradwar karong Marso si Dodoy sa kursong BSED-Mapeh sa diha University of Cebu-Main Campus.

Lumad nga taga San Roque, Northern Samar si Dodoy apan nibalhin pagpuyo ilang pamilya dinhi sa Sugbu human nag-away iyahang mga ginikanan. Ikatulo siya sa upat nga managsuon. Giangkon niya nga siya ra ang nakatungtung og kolehiyo  nilang tanang magsuon.

Mananagat ang iyahang amahan ug ka usa sa usa ka adlaw lamang sila maka kaon. Ug kun makakaon man sila, asin ug lubi lang nga ilahang sabawan aron matambalan ang nagkutoy nilang mga tiyan.

Motabang og pagpangita og kapangwartahan si Dodoy aron makakaon sila. Sigun pa niya nga usahay mosulod ra siya nga walay kaon ug bawon, apan wala niya kini igsapayan kay gitanom niya sa iyahang alimpatakan ang determinasyon nga makalampos sa pagtuon.

Dose anyos si Dodoy sa unang pagtikang niya dinhi sa Sugbu ug dinhi na nipadayon og tungha sa elementarya isip Grade 6 na kaniadto.Naglisud sila og pangita og kapuy-an pag-abot dinhi sa Sugbu apan gikaluy-an sila sa Ginoo sa dihang gipapuyo sila sa higala sa iyahang inahan diha sa Carreta. Nagtrabaho isip labandera sa iyang higala ang iyahang inahan ug mao kini ang gikuhaan nila og gasto sa inadlaw-adlaw nga panginahanglanon.

Gawas sa pagkalabandera, usa ka negosyante usab ang iyahang inahan. Lain higala niini ang nihatag  og P500 aron ipuhonan og gamay nga negosyo. Matod pa nga maayo mopadagan og kwarta iyahang inahan tungod sa kasinatian niini didto sa Manila isip sinaligan sa usa ka dakong tindahan. Nilambo gyud ilahang negosyo, gikan sa baligyang mga candy, sigarilyo, biscuits, nakapuhonan na kini og baligya nga softdrinks. Pipila ka buwan sa pagpuyo dinhi sa Sugbu, wala naka-agwanta ilang amahan ug niapas kanila dinhi hinungdan nga nakompleto pagbalik ang ilahang pamilya. Grade six pa lang si Dodoy nagsugod na siya og paninda sa kadalanan uban iyahang amahan. Sigun pa niya nga dinha na gyud dapit sa Mabolo Police Station ang ilahang pwesto sukad pa kaniadto. Giangkon ni Dodoy nga gamay ra gyud siya og kita sa pagbaligya og tubig apan makatabang na kini sa ilang pagkaon ug pambayad sa iyang pagtungha. Matod pa niya nga matag Domingo ra modako iyahang kita kay tibuok adlaw man siya maninda, dili sama sa laing mga adlaw diin tunga ra siya sa adlaw makabaligya og tubig.

“Pag high school nako, alas kwatro ko sa hapon maninda, human sa akong klase,” nagkanayon siya dinhi sa Banat News Tingusbawan.

Hangtod karon maninda gihapon siya og tubig matag bakante niya. Tanan niyang halin ihatag niya ngadto sa iyahang inahan ug mao kini ang gamiton pambayad sa iyahang matrikula.  “Sukad 1st year college hangtod karon kay maninda ko kun vacant time para makatabang ko ni mama sa pagbayad sa akong tuition,” angkon pa niini.

“Best in costume”

Nisikat si Dodoy gumikan sa iyang estilo sa pagpaninda og tubig nga lahi sa uban. Gawas sa pagbaligya, molingaw sab si Dodoy sa iyang mga kustomer pinaagi sa pagsul-ob og lain-laing mga costumes samtang naninda. Mao kini ang pamaagi niya aron makatawag sa atensyon sa mga tawo ug daghan ang mopalit niya og tubig. “Nagsugod ko og sul-ob og mga costumes samtang maninda og tubig kay kadtong first year high school ko,” niya pa. Bayot si Dodoy apan dili kini babag sa pagpamaligya og tubig,  gani daghan gyud ang malingaw kaniya hilabi na ang mga pasahero sa jeep.

“Sa una akong tingog kay hait pa kaayo, pero karon nga daga na ko kay dili na kaayo--kay daga naman kuno ko oy. Hahaha,” komedya pa niini. Matag buwan kay mag-ilis siya og costume sama lang niadtong Valentine’s Day nga napuno iyang lawas og mga kasing-kasing.

Epektibo alang kaniya ang pagsul-ob niya og lain-laing costumes samtang maninda og tubig kay matod pa tungod niini nisikat siya. Apan bisan pa man og daghan na ang nakaila kaniya  pabilin gihapon siyang mapaubsanon ug wala nausab iyahang batasan.

“I’m humble lang gyud, dili ko mausab kun unsa ko karon. Until to the end, ingon ra gyud ko (ani). Sama sa giingon ni Dr. Jose Rizal… ‘Ang taong di marunong lumingon sa kanyang pinanggalingan, ay di makakarating sa kanyang paroroonan,” sigun pa niya.

Giangkon sab niya nga nakasinati sab siya og pagtamay gikan sa mga kauban niini sa klase sa hayskul pa siya tungod sa pagbaligya niya og tubig.

Gipaambit sab ni Dodoy nga grabe ilahang kalisud sa dihang giataki sa high blood iyahang amahan. Matod pa niya nga usahay mag-promisory lang siya sa tunghaan aron makakuha og exam. Nakaagi og daghang suliran sa kinabuhi si Dodoy apan sigun pa niya dili siya magpaapekto sa mga problema ug iyaha kining sagubangon aron masulbad.

“Kun naa koy problema, kay dili nako dibdibon, ikatawa lang nako mura’g wala koy problema but deep inside naa gud. Ang problema masulbad ra na. Dapat step-by-step gyud ka para masulbad na siya,” niya pa.

Nakita si Dodoy isip malipayon nga binuhat, apan dili lamang siya malipayon kun dili puno siya sa sulondong mga hiyas. “Si Dodoy ay mabait na bata,masipag, higit sa lahat ay respetado. At hindi titigil hanggat hindi mararating yung pangarap niya sa buhay,” hulagway pa niya sa iyang kaugalingon.

Dako og pagtuo si Dodoy nga nahimugso siya aron mamahimong inspirasyon ngadto sa mga kabatan-onan. “Ang kapobre kay dili gyud babag para dili ka makaeskwela. Kun naa lang kay will, kun ganahan ka nga imong life mausab, fight fight fight, never never give up!” sigun pa niya. Busa sugyot niya sa mga batan-on nga gusto molampos mao nga moeskwela gyud.

“Eskwela gyud mo. Ang diploma dili gyud na makawat, kanang trabaho naa ra na, apan imong diploma madala na igkamatay nimo,” makahuluganon niyang pamahayag. Giangkon niya nga gitambagan  siya nga pasudlon sa Pinoy Big Brother apan mas gipili gyud niya nga motungha.

Gibutyag niya nga Education iyahang gikuha tungod sa pangandoy sa iyahang inahan. Matod pa nikuha kini og kursong education iyang mama apan wala nahuman. Busa siya nalang ang motuman sa pangandoy niini.

Walay puas ang kalipay nga gibati ni Dodoy nga hapit na gyud siya mogradwar sa kolehiyo ug makita na gyud niya ang bunga sa iyahang mga paningkamot.

“I know I have new journey after graduation, aduna pay mga pagsulay pero mao gihapon, fight ng fight and go lang ng go,” panapos pa niya.