Talisay maningil sa saktong bahin sa MCWD
CEBU, Philippines - Mangayo ang kagamhanan sa Dakbayan sa Talisay sa saktong bahin sa kita sa Metropolitan Cebu Water District (MCWD).
Si Atty. Giovanni Sususco, ang city legal officer, nitug-an nga iya nang gihan-ay ang Memorandum of Agreement (MOA) aron sa pag-usab sa unang gikasabutan tali sa siyudad ug MCWD.
Ang MOA nahimo sa panahon nga munisipyo pa ang Talisay nga gidumala ni kanhi mayor Dehlia Tiu sa tuig 1994.
Matud ni Sususco nga makadawat og tseke ang siyudad gikan sa MCWD matag quarter sa kantidad nga P300 mil.
Samtang si City Treasurer Emma Macuto niingon nga makadawat sila og bahin nga dili molapas tunga sa milyon ka pesos apan wala siya mahibawo og giunsa kini nila pagkuha. Ang konseho nagtinguha nga mausab ang MOA tali sa kagamhanan ug MCWD aron dili sab maalkansi ang siyudad.
Lakip sa tinguha sa siyudad mao ang pag-imbentaryo sa mga lugar diin nahimutang ang ilang pumping station ug asa ang ilang mga tinubdan sa tubig nga anaa karon sa Talisay. Gusto sab nila nga aduna silay representante sa MCWD Board.
Buot ni Sususco nga adunay kaugalingong metro sa tubig ang City Hall aron sila mismo mahibawo sa gidaghanon sa tubig nga makuha sa siyudad.
Nagkanayon si Sususco nga dili maayong paminawon nga sila sa Talisay gikuhaan og supply sa tubig sa MCWD nga gibaligya sa ubang mga lugar apan adunay mga barangay sa Talisay ang walay hapit supply sa tubig. (BANAT NEWS)
- Latest