Naghikog kay wala mataori og postiso
CEBU, Philippines - Patay na nga nakit-an sa 38 anyos nga lalaki ang iyang ka live-in nga 32 anyos nga babaye nga gidudahang naghikog gamit ang malong sud sa ilang balay diha sa Sitio Kawayan, Brgy. Sambag 2 ning Dakbayan sa Sugbo. Ang naghikog giila nga si Zoreta Himalan, samtang ang iyang ka live-in nga si Michael Villamala ang sulay pa unta nga mitabang kaniya apan patay na gyud kini.
Matud pa ni Senior Police Officer 2 Ruth Violango, imbestigador sa Homicide Section sa Cebu City Police Office nga nahinabi sa Banat News makaduha na ka higayon nga misulay og hikog ang maong babaye apan napugngan ni Villamala.
Sumala pa ni Violango nga usa sa gikahiubsan sa babaye kay wala kini napataoran og postiso. Matud pa niya, gusto na gyud sa babaye nga mobalik og trabaho isip usa ka bar attendant.
Sigun pa ni Violango medyo mahal ang gasto sa pagpataod sa postiso maong wala usab nakahatag niini ang kapuyo kay kini wala say tarong nga trabaho.
Ang mga sakop sa Cebu City Emergency Medical Services ang sulay pa unta nga mitabang sa babaye apan nakabsan na kini sa kinabuhi. Wala say nakita nga foul play ang kapulisan sa maong hitabo. (BANAT NEWS)
- Latest