Tom O di mahutdan sa premyo

CEBU, Philippines -  Gipasalig ni Cebu City incoming Mayor Tomas Osmeña nga dili siya mahutdan og kuwarta nga iprempyo ni bisan kinsa nga makapatay og mga druglords, drug pushers ug ubang badlungon sa katilingban sa dakbayan.

Gitug-an usab ni Osmeña nga gawas kaniya, daghan sa iyang mga higala ang nipasalig nga sila motabang pagtigum og kuwarta aron nga dili mahunong ang paghatag og cash reward sa mga makapatay og dautang elemento sa katilingban.

“Dunay uban nga niingon nga sila’y moabaga sa ipremyo sa makapatay og bali’g duha ka druglords o drug pushers, apan akong giingnan nga standby lang usa,” matud ni Osmeña.

Tag P50 mil ang ihatag nga cash reward ni Osmeña sa mga polis, tanod o mga sibilyan nga makapatay og druglords, pushers, tulisan ug ubang mga badlungon nga maghatag lang og problema sa katawhan.

Nahatagan na gani ni Osmeña og P50 mil kadtong mga polis nga nakapatay og suspetsadong drug pusher nga nisukol dihang gironda ang iyang pinuy-anan sa Barangay Sudlon II sa niaging semana.

Tag P5 mil usab ang ihatag ni Osmeña kun ang badlungon sa katilingban igo lang maangol apan kadtong polis nga nakapusil ug niangol sa duha ka tulisan gihatagan niya’g P20 mil kay atol sa maong higayon “off duty” ang polis apan niresponde gihapon.

Gipasidan-an ni Osmeña ang mga polis nga protektor sa mga druglords ug ilegal nga kalihukan nga kun may mga sibilyan nga agresibong mopatay kanila, gantihan niya kini sa ilang nahimo.

Daghang sibilyan nga nagtinguha og kalinaw apan mahadlok nga mohimo og lakang bisan na lang sa paghatag og kasayuran sa mga polis sa ilegal nga binuhatan sa maong tawo.

Matud ni Osmeña nga kini maoy baligtad kaayo sa kanunay'ng gilitok sa katawhan nga kun kantahon nila ang nasudnong awit nga nagkanayon “Aming ligaya, na pag may mang-aapi, ang mamatay nang dahil sa iyo.”

Naguol si Osmeña kay anaa sa top list ang Dakbayan sa Sugbo sa mga dapit nga daghan ang patay ug ubang krimen mao nga gusto niyang ibalik ang kalinaw sa iyang administrasyon. (BANAT NEWS)