CA Justices imbitahon ni Osmeña

CEBU, Philippines - Nagtinguha si Cebu City Mayor Tomas Osmeña nga  imbitahon ang mga hukom sa Court of Appeals nga personal nga tan-awon ang Inayawan Sanitary Landfill aron sila mismo makakita sa sitwasyon.

Ang CA misugyot nga angay magsabot ang duha ka habig pagpangita og “win-win” solution bahin sa problema.

Usa niini ang pagpadayon og labay sa siyudad og basura diha sa Inayawan apan limitahan na lang kini ug kinahanglang mangita nang daan og laing kalabayan og basura ang siyudad.

Kini samtang wala pa mogawas og Temporary Environmental Protection Order (TEPO) basin og mosamot ang problema labot sa Inayawan Landfill.

Apan ang mayor sa iyang bahin miingon usa lang gyud ang mogawas nga mananaog sa maong kaso ug kini mao ang siyudad ug dili siya, dili si Konsehal Joel Garganera ug dili ang landfill operator.

Dili na gusto pa ang mayor nga mohatag og dugang detalye apan kini miingon ang usa sa mga huwes nangutana kun nganong wala ang mayor atol sa hearing nga gipahigayon niadtong adlaw’ng Martes.

Sigon sa mayor wala siya masayod nga kinahanglanon siya didto apan iyang giklaro nga andam ra siya moatubang sa mga huwes aron pagtubag sa mga pangutana sa sunod hearing.

 “I tried to be as open, as transparent as possible and make myself available, I will invite the justices to do a site inspection in the landfill, I’m not interested in winning or losing, I don’t care if I’m the loser, I just want the city to win that’s all,” matud ni Osmeña.

Samtang si Mandaue City Mayor Luigi Quisumbing miingon nga supak siya nga moagi sa ilang siyudad ang mga garbage truck nga maghakot og basura gikan sa dakbayan sa Sugbo paingon sa landfill sa Consolacion kun mahukman nga ang dakbayan molabay pagbalik og basura didto.

Matud ni Quisumbing nga ang dakbayan sa Mandaue adunay gipatuman nga truck ban, ilabi na panahon sa adlaw, ug wala siya’y tinguha nga libkason kini.

Si Osmeña di na gustong mobalik sa pagpalabay’g mga basura sa pribadong landfill sa Consolacion ang dakbayan tungod kay nagtuo siya nga dako kaayo ang nakuwarta sa pipila ka opisyal niini  atol sa kanhi administrasyon.

Matud pa walay kontrata ang dakbayan ug sa tagdumala sa landfill, apan ang dakbayan nagbayad og P700 sa matag tonelada nga basura isip tipping fee sa pribadong hauling company ug laing P700 sa matag tonelada sa paglabay sa maong pribadong sanitary landfill  sa Consolacion. Decemay P. Padilla ug Rene U. Borromeo (BANAT NEWS)