Bumibilib si Austria sa kanyang Beermen

MANILA, Philippines - Mula sa pahirapang championship series laban sa Barangay Ginebra sa nakaraang 2017 PBA Phi-lippine Cup ay nagulat si coach Leo Austria sa ipinakita ng kanyang San Miguel sa kanilang unang laro sa Commissioner’s Cup noong Linggo.

Tatlong players ang tumapos na may higit sa 20 points para patumbahin ng Beermen ang Meralco Bolts, 99-92.

Ayon kay Austria, hindi niya inasahan na magiging maganda ang unang laro ng San Miguel sa mid-season conference bagama’t nanggaling sa pagsibak sa Ginebra sa nakaraang PBA Philippine Cup Finals.

“I never thought na we will be playing like this. Especially at the start dahil I’m expecting na mag-struggle kami dito sa simula. It’s very obvious na everybody was so rusty,” sabi ni Austria.

Sinabi ng mentor na nakatulong sa kanilang panalo sa Bolts ang eksperyensa ng Beermen sa nakaraang championship series.

“Because of our experience in the championship, that second half doon dumating and we were able to take care of the situation,” ani Austria.

Kumolekta si three-time PBA Most Valuable Player June Mar Fajardo ng 24 points at 12 rebounds habang nagtala si import Charles Rhodes ng 22 points at 12 boards sa kanyang PBA debut.

Nagdagdag si Alex Cabagnot ng 23 markers, ang 16 ay kanyang iniskor sa second half bukod pa sa 9 assists at nag-ambag sina Marcio Lassiter at Arwind Santos ng 16 at 12 points, ayon sa pagkakasunod.

Ang unang kabiguan naman ang nagdulot ng mantsa sa dating malinis na 4-0 record ng Meralco.