Nabulabog nga isyu

Mikatay na ang kontrobersiya sa insidente sa road rage nga gikalambigitan sa anak sa usa sa mga prominente nga pamilya sa dakbayan sa Sugbo ug sa usa ka nurse. Ug naugkat ang dugay ra nga isyu nga mi-headline sa mga pamantalaan pipila ka tuig na ang milabay.

Grabe nga nakakisikisi ang artista’ng si Ellen Adarna batok sa pahimangno ni Mayor Tomas Osmeña alang sa mga anak sa mga adunahan sa dakbayan kinsa iyang ginganlan og mga spoiled brats sa dili pagpatuyang sa pagpabadlong.

Nangyam-id si Adarna sa maong pamahayag sa mayor, ug ginganlan usab sa dalaga ang anak sa mayor nga si Miguel nga usa ka spoiled brat kaniadto kinsa iyang giakusahang mihulga kuno sa iyang mga barkada.

Giakusahan ni Adarna si Miguel nga mipusil sa digital camera sa iyang amiga atol sa usa ka insidente walo ka tuig na ang nakalabay. Apan gihimakak kini ni Miguel. Wala kuno siya nanganti batok ni bisan kinsa. Ambot kun kinsay nag-estorya sa tinuod.

Niining pagtumaw sa isyu sa spoiled brats, klarong naigo sa bala si Miguel sa word war tali ni Adarna ug Mayor Osmeña. Kini gumikan kay naugkat na hinuon ang insidente kaniadto nga gikalambigitan ni Miguel.

Sa akong paniid, mura’g dehado si Mayor Osmeña niining sitwasyona. Sa iyang pagpatol sa pahit ni Adarna, iya na hinuon nga naduhig si Miguel ngadto sa isyu sa mga spoiled brat, ug sama ra nga naigo ang mayor sa kaugalingon niyang pana. In fairness ni Miguel, ambot kun spoiled brat ba kini kaniadto sama sa gialegar ni Adarna. Wala ko makamatikod nga sige kini og panghasi sa dihang ulitawo pa kini. Apan gumikan lagi sa maong insidente, siguro adunay mga mohukom nga nahulog siya sa maong kategoriya kaniadto.

Mao na nga kun ako pa’y Mayor Osmeña, dili na lang nako padak-on kining mao nga isyu. Hinuon, isip mayor, katungod niya ang pag-isyu og warning ngadto sa mga spoiled brats sa dakbayan. Apan niining pagkisikisi ni Adarna, nabulabog na hinuon ang isyu nga gikalambigitan ni Miguel kaniadto.