Buto ng tao nahukay sa gilid ng daan
MANILA, Philippines - Nadiskubre ang may 75 pirasong buto na pinaniniwalaang pag-aari lamang ng isang tao, na nakalagay sa sako at ibinaon, sa gilid ng kalye sa panulukan ng President Quirino at Linao St., sa Ermita, Maynila, kamakalawa.
Sa ulat ni PO3 Ryan Balagtas ng Manila Police District-Homicide Section, dakong alas-10:00 ng umaga nitong Biyernes nang ireport sa kanila ang nahukay na kalansay sa nabanggit na lugar.
Patuloy pang inaalam ng MPD-Crime Laboratory kung babae o lalaki ang kasarian nito.
Sinabi ng construction worker na si Alexander Pascual, 40, ng Ramon Fira Builders habang naghuhukay sila para ibaon ang konkretong poste ng Meralco ay tinamaan ng pala ang sako na may lamang matigas na bagay.
Nang busisiin ay nakita na mga buto, kabilang ang bungo at mga paa, na nakasilid sa sako.
Ipinabatid ito kay Chairman Felimon Tutica ng Barangay 743, Zone 80, na nagreport naman sa pulisya.
Hindi pa binanggit sa ulat kung may ilang taon nang patay ang kalansay at kung biktima ito ng krimen.
- Latest