Barangay Captain nga positibo sa drug test nahibulong

CEBU, Philippines - Nahibulong kaayo si Busay Barangay Captain Amilo Lopez ngano nga nagpositibo siya sa paggamit og ginadiling drugas atol sa gipahigayong drug test kanilang mga barangay kapitan kaniadtong Huwebes.

Bisan og si Dr. Alice Utlang, pangulo sa Cebu City Office for Substance Abuse Prevention (COSAP), wala motug-an nga si Lopez maoy nagpositibo sa drugas, apan si Mayor Tomas Osmeña ang mitug-an sa mga reporters.

Matud sa mayor nga may mitug-an kaniya nga ang kapitan sa Busay maoy nagpositibo sa drug test. Dihang gikontak sa Banat News si Lopez, wala molimod ang kapitan nga siya ang nagpositibo sa drug test.

Apan matud ni Lopez nga natingala gyud kaayo siya nga wala man gyud mahitabo nga migamit siya niining maong ilegal nga matang sa drugas.

“Ngano.... ambot ngano? Basta ako, dili ko guilty, bisan gamay dili ko guilty kay wa gyud ko migamit niana, kun moingon hinoon mo nga maintenance medicines, diay daghan, pakit-on nako mo sa akong mga gitumar nga maintenance nga tambal ug mga vitamins," matud ni Lopez.

Si Lopez misaysay nga kaniadtong Disyembre 26, na-admit siya sa ospital tungod sa sakit sa kasing-kasing ug pagsaka sa iyang high-blood pressure mao nga gihatagan siya og mga maintenance drugs ug vitamins.

Gitug-an usab ni Lopez nga kanunay usab siya nga moinom og tambal nga makapalagsik sa lawas ug usa kini sa gituohan niya nga nakapa-positive niya sa paggamit og drugas.

Matud ni Lopez nga mokunsulta siya sa iyang abogado kun unsay sunod niya nga mga lakang. Si Dr. Utlang miingon nga ang urine sample nga nakuha nila gikan sa kapitan, isumiter nila og confirmatory test sa Crime Laboratory Service sa Manila.

Samtang si Osmeña sa iyang bahin miingon nga mas maayong mo-resign na lang ang kapitan kay makadaut kini sa imahe sa ilang barangay.

Matud sa mayor, daghan pa nga mga barangay officials ang nalambigit sa ilegal nga drugas hinungdan nga dunay pipila ang wala motambong sa drug test nga gihimo.

“It’s not the matter he or she be ashamed, it’s a matter that the people should know,” matud sa mayor. Rene U. Borromeo ug Decemay Padilla (BANAT NEWS)