J. Hayag kampiyon sa 7th J.J. Surplus Ballclub Tourney

CEBU, Philippines - Mas hayag pa sa sidlak sa adlaw ug sangko sa langit ang kalipay sa J. Hayag Marketing human maangkon ang kampiyonato sa 7th Conference sa J.J. Surplus Ballclub basketball tournament niadtong Miyerkules didto sa GT Academy gym sa Tayud, Lilo-an.

Sila si Romnick Dela Rama ug Aducol Maglasang parehong midagkot og 14 puntos sa J. Hayag ni Joelee Hayag, apan si Dela Rama maoy napiling Finals MVP tungod sa maayo niyang salida   sukad gisugdan ang maong conference.

Gipangulohan sab ni Henry Gestopa ang Union Galvasteel nga mikadlit og 13 puntos. Si Lito Dejarme mitampo og 10 puntos sa Union Galvasteel ni Arnold Labustro, kinsa igo lang mitampo og kuwatro puntos sa iyang team.

Sa pasiunang duwa, ang E-F Surplus miarangkada sa hinapos nga bahin sa fourth quarter aron pagpilde sa J.J. Surplus, 102-100 ug ingon man pagpahiluna sa ikatulo nga dapit.

Si Fury Trazona maoy kuyaw kaayo nga nakaduwa ug gipangulohan ang iyang team E-F Surplus pinaagi sa iyang 28 puntos, lakip ang 10 ka triples alang sa iyang “back-to-back” MVP of the conference.

Nakakuha sab siya og suporta gikan nilang Anton Trangia nga miratsada og 25 puntos, Apyak Sabang nga mikabya og 16 puntos ug Jade Layese nga miariya og 11 puntos.

Ang J.J. Surplus ni Henry Agbon, gipangulohan ni Larry Oroyan nga mipabuto og 22 puntos, gisundan ni Jomar Tiwan sa iyang 20 puntos. Sila si James Hayahay ug Rey Patiluna mitimbre’g 19 ug 13 puntos matag usa.

Pirmeng   naggukod  ang E-F Surplus gikan sa pagsugod ug nalubong pa kini og 15 puntos.  Apan sa katapusang tres minutos sa final period, nagpauwan og tres nga maoy pabilo sa init nilang rally hangtod nga nailog ang labaw.

Ang liga nagmalampuson tungod sa pagtinabangay sa tanang miyembro sa ballclub.

Ubos sa superbisyon sa presidente nilang si Henry Agbon, ang liga gipadagan ni commissioner Fury Trazona sa abag ni technical committee Chang Tejero ug ingon man nilang Anjing ‘Alpha’ Flores ug Choy Pilapil.

Puntos matag usa

Unang duwa:

E-F SURPLUS (102) – Fury 28, Trangia 25, A. Sabang 16, J. Layese 11, Caballes 8, Amer 2, K. Sabang 2.

J.J. SURPLUS (100) – Oroyan 22, Tiwan 20, Hayahay 19, Patiluna 13, Astillero 9, Genteroloso 8, Dela Cruz 5, Monto 2, J.H. Agbon 2.

Ikaduhang duwa:

J. HAYAG (71) – Dela Rama 14, A. Maglasang 14,  Cabahug 11, B. Maglasang 9, Villares 7, Lofranco 7, Pepito 3, B. Hayag 2, Sanoria 2, J.L. Hayag 2.

UNION GALVASTEEL (65) –  Gestopa 13, Dejarme 10, Gellocane 7, Retiza 7, Ravanna 5, Labustro 4, Judaya 3, Mantos 3, Riveral 3, Flores 3, Lozano 2, Capin 2, Orongan 2, Macasero 2, Boyles 1. (BANAT NEWS)