Gitigbas sa silingan patay

CEBU, Philippines - Usa ka 32 anyos nga lalaki namatay human gitagod og tigbas sa bana sa kaipon sa iyang igsuon diha sa Sitio Napo, Brgy. Sapangdaku ning Dakbayan sa Sugbo.

Ang biktima giila nga si Cesar Heliacone, dunay kapuyo samtang ang suspetsado mao si Marcelo Sacamay, silingan ra sab sa biktima.Sa imbestigasyon sa kapulisan sa Homicide Section sa Cebu City Police Office nagtagay ang suspetsado ug ang biktima kauban ang lain nila nga paryente nga si Wilson Sacamay.

Unang mibiya sa tagay si Wilson ug misunod si Cesar apan pipila pa lang ka metros kini nakabiya gisundan kini sa suspetsado ug gipasanginlan silang duha nga adunay dautang plano kaniya. Ang duha mialam-alam kaniya ug gihimakak ang iyang pagduda apan wala kini naminaw ug niibot sa iyang dala nga sundang ug gitigbas ang biktima samtang si Wilson nakadagan.

Si Police Officer 3 Cristobal Gerenimo miingon nga hangtod karon padayon pa nila nga gipangita ang suspetsado. (BANAT NEWS)