OJT nagdala og sundang napatay sa polis

CEBU, Philippines - Napusilan patay ang usa ka On-the-Job Training (OJT) sa usa ka kadu nga kompaniya nga nagbase sa Brgy. Sabang sa Dakbayan sa Danao dihang suway ining tigbason ang polis gamit ang 12 ka pulgadang sundang alas 5 pasado sa hapon sa niaging adlaw.

Giila ang namatay ni PO3 Roselo Campo sa Danao City Police nga si Mark Anthony Coronel, 20 anyos taga Brgy. Buluang sa Lungsod sa Compostela ug ang nakapusil niini mao si PO1 Wilfred Distrito, sakop sa SWAT.

Matud ni PO3 Campo nga mosulod sa trabaho niadtong higayona ang namatay ug sa dihang girikisa, nadiskubrehan nga nagdala kini og sundang.

Gumikan niini, gipabilin ang maong sundang sa mga guwardiya sa guardhouse apan nagdumili kini ug nipadayon pagsulod sa iyang buhatan hinungdan nga gisundan kini sa mga guard on duty nga sila si Darwin Lupo ug Jen Monus.

Nangayo og tabang ang maong mga guwardiya sa kapolisan sa Danao hinungdan sa pagtubag sa SWAT. Giingong ilang gihangyo si Coronel sa pagbutang sa gidala niya nga sundang.

Gibutyag ni PO3 Campo nga nihamag si Coronel kang PO1 Distrito ug sulay nga gitigbas ang polis hinungdan nga nagkabuang kini og sagang hangtod nga napugos ang polis sa pagpusil ni Coronel.

Naigo sa dughan ug uban pang bahin sa iyang lawas si Coronel kinsa suway pa nga gidala sa Danao Provincial Hospital apan gideklarar kini sa mga doktor nga dead on arrival.

Gisusi pa kun unsay hinungdan kun nganong nagdala og sundang sa iyang trabahuan ang namatay. (BANAT NEWS)