Ang tuko sa iba
Maine Mendoza at Alden Richards
Alas 10 pasado sa gabii. Mingaw na ang kalikopan. Migawas si Arman sa balay ug mipaingon sa dakong punoan sa iba sa tugkaran. Bitbit niya ang iyang selpon. Tuyo niya nga tawagan ang iyang teksmeyt nga si Gemma. “Man, nganong samokon man gyod ta sa tuko kon mag-estorya na ta?” Nakapangutana si Gemma usa kadto ka gabii nga gitawgan siya ni Arman.
“Ambot aning tukoa, Gem, uy, nganong mipuyo ni sa iba?” Dugay na nga nagkateksmeyt sila si Arman ug Gemma. Nakuha ni Arman ang ngalan ug mobile number ni Gemma sa usa ka tulomanon sa radyo nga mobasa og greetings ug mosibya sab niadtong mga tigpaminawan nga nag-wanted og teksmyet. Napugos si Arman pagpangitag teksmeyt kay gilaayan siya tungod kay atua man god sa Bohol ang iyang asawa ug mga anak. Ania siya sa Sugbo kay nanarabaho. Gipatuo ni Arman nga ulitawo pa siya.
Hangtod nga nagsige na ang ilang tinawganay.
“Tuko! Tukooo...Tukooo..” “Hala, Man. Mitingog na sab ang tulo.” “Giahak gyod ning tukoa, Gem, uy! Pero mora mag pagaw-pagaw? Nahikatawa si Gemma. Unya... Kraaakkkk...!”
Kalit naigpot si Arman kay nasapli man ang usa ka sanga sa iba. Unya... “Ginoo ko...” Tingog nga naggikan sa itaas sa iba. Paghangad ni Arman maoy iyang nakita si JR nga nagkumpayot sa laing sanga. “Uy! Ikaw man god na, JR! Wa diay ka magpalod?”
Mikatawa si JR ug miingon: “Tiyo, gitan-aw nako imong selpon ganina dihang nangihi ka sa gawas. Gibasa nako kinsay nagteks nimo. Hala ka, Tiyo ... isumbong tika ni Tiya Salie sa Bohol ... duna diay kay teksmeyt!”
Naglagot si Arman. “Kanaog diha kay labtikan ko nang imong itlog!” Hapit matagak si JR ug mitig-ik nga nagtinuko: “Suko! Sukooo!!!” Pagkaugma sayo kaayong mitingog ang tinuod nga tuko sa iba: “Tuko! Tukooo... Tukoooo!!!”
Nakangisi si Arman nahanduraw niya kon unsay mahitabo sa iyang pamilya kon mosige gihapon sia pagpakigteksmeyt kang Gemma. Unya gikuot niya ang selpon sa iyang bolsa ug iyang gipangita ang ngalan ni Gemma sa ponbok. Unya iya kining gi-delet.(Kataposan)
- Latest
