Alvarez pinadedeklarang iligal ang JVA
MANILA, Philippines - Inamin ni Justice Secretary Vitaliano Aguirre III na hiniling ni House Speaker Pantaleon Alvarez sa Department of Justice (DOJ) na ideklarang illegal ang Joint Venture Agreement (JVA) sa pagitan ng Bureau of Corrections (BuCor) at Davao-based Tagum Agricultural Development Company Inc. (Tadeco).
Subalit hindi umano ito napagbigyan ng kalihim dahil wala siyang kapangyarihan para mag-isyu ng nasabing deklarasyon.
Ginawa ni Aguirre ang pag-amin kahit nilinaw ni Tadeco president and CEO Alex Valoria na ang JVA ay balido at legal, malaking kapakinabangan sa gobyerno at sa may 30,000 direct at indirect workers sa banana industry at iba pang related sectors.
Ipinaliwanag ni Valoria sa mga mambabatas sa ginawang pagdinig ng House Committee on Good government and Public Accountability at Justice Committee ang constitutionality at legality ng JVA ng Bucor-Tadeco.
Nagsumite din siya ng position paper ng Tadeco para sa dalawang komite para sagutin isa-isa ang umano’y mga maling alegasyon laban sa kumpanya.
Iginiit naman ni Aguirre na tanging ang presidente lamang ang maaaring magkansela ng JVA sa pagitan ng Bucor at Tadeco.
“Actually in the letter which we received from Speaker Alvarez they are asking us to declare more or less the contract as illegal. I believe that we could not do it. The DOJ, the Secretary of Justice cannot do it,” ayon sa kalihim.
Kinilala naman ni Aguirre na libo-libong manggagawa ng Tadeco at kanilang mga pamilya ang nakikinabang sa naturang kumpanya gayundin ang pagbabayad ng milyon-milyong pisong buwis sa gobyerno.
- Latest