DSWD-7 nangita’g interns

CEBU, Philippines - Ang Department of Social Welfare and Development-7 nagsugod na og panawat og mga aplikante isip interns karong summer ubos sa Government Internship Program.

Gipahibawo ni Leah Quintana, ang tigpamaba sa DSWD-7 nga magsugod ang ilang internship program karong Abril 17 hangtud Mayo 29, 2017. Diin adunay stipend nga P265 ang intern sulod sa otso ka oras nga trabaho matag adlaw.

Matud ni Quintana nga sa 1, 440 ka mga batan-on nga nag-edad og 18-anyos hangtud 25-anyos nga gigahin sa DSWD Central Office sa tibuok nasud, 80 ang gigahin nga intern sa DSWD-7.

Ang GIP usa sa naglangkob sa Kabataan 2000 nga programa sa gobyerno nga gipalambo aron sa paghatag og kahigayonan sa mga out-of-school ug in-school youth nga  makasinati sa pagtrabaho sa nagkada-iyang ahensiya sa gobyerno.

Si DSWD Secretary Judy M. Taguiwalo mipadayag sa iyang suporta sa maong programa ug nagkanayon nga "This is an opportunity for our youth to learn life skills in the workplace. They will be given an effective and eye-opening introduction to how it is to work in public service, and they can consider working in government as their contribution to nation building."

Ang mga GIP interns magtrabaho depende sa ilang skills sama sa encoder, writer o motabang sa implementasyon sa mga programa sa DSWD sama sa Supplementary Feeding Program, Social Pension Program, Pantawid Pamilyang Pilipino  ug uban pa. (BANAT NEWS)