Pasko ni Inday Lolita

May sakit si inday Lolita ug matud pa sa usa ka  espesyalista nga doktor nga maoy naghiling sa sakit sa bata, lagmit dili na kaabtan og tulo ka bulan ang paglamay niini.

Ug kini maoy nakapahimong Diosnon nilang Epeng ug Lanie. Matag Domingo manimba silang duha ug ilang i-ampo nga unta dunay milagro nga mahitabo ug dili na moabot ang gisulti sa doktor kanila. Ila na ganing giadto ang mga dapit nga nadungog na sa pagka-milagrosa o milagroso.

Si inday Lolita nagpanuigon nag siyete anyos ug wala na makatungha tungod sa iyang sakit. Ning buntaga, bisan og luyahon siyang manglihoklihok, nakighinabi siya sa iyang mama Lanie ug papa Epeng. "Ma, Pa, sunod bulan di ba Disyembre na man, no ug unya Pasko na pud. Nindot unta ma no nga mangaroling mi, manaygon ming Lilit, Dotdot ug Ines sama sa among gibuhat adtong miaging tuig sugot mo, pa, ma?"

"Kuan, inday Lolit, may sakit ka na man dili man maayo nga magpatun-og ka labi na'g gabii mo manaygon. Anhi na lang gud ta sa balay, total nia man ming papa nimo," ni Lanie.

Disyembre 25 gabii sa Pasko, ug nia sila sa ilang talad diin dunay mga preparasyon nga lamiang pagkaon. Si inday Lolita misamot na kaluspad apan makalawlakaw pa siya. Silent Night ang gitugtog sa ilang stereo. Tautaod ilang nakita si inday Lolita nga mipaingon sa bentana ug milantaw sa langit. Gitutokan sa bata ang halayong langit.

"Ma, sunod Pasko, kamo na lang unyang duha si papa, kay ako mokuyog man ni Santa Klaus," dihay pahiyom sa mga ngabil sa bata.

Natay-og dayon ang abaga ni Lanie sa paghilak ug nagluha pud ang mga mata ni Epeng. Ug dihang misugod na pagpakapaka ang kasilinganan sa mga butobuto kay alas dose na man ang takna, miduol kanila si inday Lolita nga mura'g luya na kaayo ug gidali nila kini pagsakwat kay karong bulana sa Disyembre, ensakto nang tulo ka bulan nga maoy tagal sa iyang sakit. (Kataposan)