Haya - Gula 106

Ingon og gihurot ang tanang tingog ni Erica sa pagsinggit samtang naggakos sa patay niyang inahan. Miduol kaniya ang uban nga mga igsuon ug nanghilak usab.

“Ma, gusto pa ko nga ikauban ka. Gusto pa kong makakita ka sa akong kalamposan. Gusto ko nga mupaso ko sa entablado nga mudawat sa akong diploma. Gusto kong makita mo ang tanan kong pagpaningkamot, ma. Ma, bukha ang imong mga mata. Dili pa ko andam nga imong biyaan. Wala pa nako makuha ang atong gitinguha nga makatapos ko sa akong pagtuon. Ma, ayaw una utang buot.

Gusto pa kong makatilaw ka’g kinabuhing haruhay, ma. Naningkamot ko aron makab-ot ko ang akong damgo nga magpuyo ta sa kaharuhay ug puno sa kalipay. Mag-unsa na man lang ko karon? Mag-unsa na man lang kining akong pangandoy nga para man ni nimo? Mama Minda, utang buot ma,” ni Erica pa nga napagaw na lang pagsige’g hinilak ug tyinabaw.

“Wala na si mama. Gibiyaan na diay ta ni mama,” ni Otoy pa nga pwerting hilak nga mihapuhap sa ulo sa inahan. Tanan nanghilak ug mingaab tungod sa kamatayon sa ilang inahan. Murag gidakdakan sa tibuok kalibutan si Erica tungod sa sunod-sunod nga nahitabo nga trahedya sa iyang kinabuhi. Nakaingon ug nagtuo na lang nga dili na gyud siguro matapos ang tanang kasakit sa iyang kinabuhi. Nakapagutana kun kinsa na usab ang mawala sa iyang kinabuhi. Nakahunahuna ang babaye nga maghikog na lang tungod kay halos dili na niya kaya ang mga pagsulay nga gihatag sa Ginoo kaniya.

Dihang nabalitaan usab ni Andy ang mahitungod sa kamatayon sa inahan ni Erica, halos kada adlaw sa haya, anaa ang lalaki, mu-bilar. Kaadlawon nang mupauli. Miduyog ang ulitawo sa kasub-an sa babayeng iyang gihigugma. Ang mga silingan usab, nagpangutan-anay kun kinsa si Andy nga kanunay nga mobilar sa haya sa inahan ni Erica. Daghan ang nagduda nga uyab ni Erica ang maong lalaki. Pero way panahon si Erica nga mutubag sa mga pangutana sa mga tawong gustong masayud kun si kinsa si Andy. Si Melche ang kanunay nga mutubag sa mga tawong usyosiro.

“Friend ni Erica?” ni Garet pa nga miiknat ang kilat.“Iknat man nang kilay nimo? Gusto kang larotan tika sa imong kilay aron mutuo lang ka nga amigo ra na namong inday si Andy? Sulti lang kay apilon ko nag larot ang balhibo sa imong ilok, iapil pa nako nang balhibo sa imong ilong nga nanglugwa na. Wa uroy ka makabantay anang balhibo nimo sa ilong no? Trim-mi sad na oy. Maayo kaayo kang mamantay sa laing tawo pero sa imong kaugalingon ay, wala gyud ka kabantay. Nagkayamukat. Hatagan tika’g samin ron.” Matud pa sa bayot. “Masuko man ka bayot oy. Igo ra gani kong nangutana.” Matud pa ni Garet. “Kinsa may dili masuko sa imong pinangutan-anan, naa pay tono nimo ay. Unya sultihan ka, murag duna gihapoy pagduda. Dili na lang gyud mo muhunong sa pagsige’g libak ni inday bisag namatyan na ni? Mangari ra man gani mo’g mamainit, mga animala mo. Nagdako lang nang kaon ninyo.” Matud pa sa bayot nga namuyboy. Midugang pa sa pag-ingon nga didto sa usa ka himantayon mipuntarya, “ug ikaw Anna, pila na man ka basong kape imong nahurot? Pila na sad ka platong biskwit imong nahurot? Mura’g dili nana snacks inyo dah, panihapon na man nang inyo. Maayo untag nakatabang mo sa namatyan. Igo ra mong maghinunghongay kay nanglibak mo kang inday Erica.” Matud pa sa bayot nga gihinay lang pagkasulti nga sila ra ang makadungog aron dili mabalda ang ubang namilar ilabi na si Andy nga naa kanunay sa tapad ni Erica.

“Ngano ka bayot, ako na say imong gidiskitahan?’ matud pa ni Anna nga napuno ang baba sa giusap niining biskwit. “Tunla sa nang imong giusap oy buang. Madunlan ka baya. Basin gahan pa ka’g kape? Aw unsa ganahan ka’g bugnawng softdrinks? Ganahan ka nga sagulan nako’g muriatic aron malimpiyo na’g gamay inyong galamhan?” matud pa ni Melche nga nangasaba sa namilar nga mga alipores ni nang Lucing. Sa kalit nasibot ang atensiyon sa mga namilar ngadto kang Lenny nga mityabaw nga nag-atubang sa lungon ni nang Minda.

“Ma, wala gyuy laing kapasanginlan ining imong kamatayon kun dili ang naghatag nato’g kaulawan. Ikaw Erica, ikaw ang hinungdan sa kamatayon ni mama!” Ni Lenny pa nga gitulisok si Erica nga naglingkod tapad kang Andy. (Sumpayan)