Adunahan nga igsoon
Datua na gyud nimo Manoy,sa? Naay 60 ka sangang tindahan og fried chicken," ni Betty ngadtos iyang maguwang nga si Carlo. Nipahiyom lang ang naulahi human gipadayon ang manghod. "Kining imong balay, hidden mansion man ni.
Kun tan-awon sa dapli’g karsada, daw gamay ra. Pero inig sulod nimo, niokupar og tunga sa bungtod" ni Betty. Naghinabi sila ning sayong kahaponon sa balay sa naulahi, sa barangay Lubas ning dakbayan.
"Nganong nasuroy man ka?" ni Carlo. "Mohuwam unta ko nimo'g P300,000" ni Betty. Naisang kilay ni Carlo. Dalaga pa iyang manghod. Kwarenta nay edad. Napaangkan. Maoy nagsuporta sa anak nga si Kevin nga nagtunghas hayskul. Bag-o lang niuli gikan sa Hong Kong human sa 10 ka tuig nga nag-domestic helper. "Unsaon man nimo ang kuwarta?" ni Carlo. Magnegosyo ko" ni Betty. "Kun gusto ka'g negosyo ablihan tika'g laing tindahan og fried chicken. Ikaw modumala. Tunga tas income. Kahago ray imo" ni Carlo. "Di ko, manoy oy. Kapoy kaayo nang negosyoha" ni Betty.
"Way negosyong di kapoy. Unsa mang negosyoha imong nahunahunaan?" ni Carlo. "Herbal medicine ug beauty products" ni Betty. "Di man na kinahanglang dakong puhonan. Bayad ka lang membership, makaangkat ka nag igbabaligya. Hatagan tika'g P30,000. Tabang nako nimo" ni Carlo. Niminghoy si Betty. "Ayaw na lang" ni Betty. Nikuot na si Carlo sa bag sa iyang wala, aron moihap og kuwarta. "Si Tessie atong kinamanghuran, giyano lang nimo'g pahuwam og P350,000.00" ni Betty. "Di to huwam. Hatag to. Ikaw bay madisgrasya. Madasmagan bus ang traysikol gisakyan. Di man moabaga ang tag-iya sa bus kay sad-an man ang traysikol. Kun ikaw pay nadisgrasya, mao gihapon. Motabang ko nimo. Ayaw anang suyasuya. Paningkamot sa imong kaugalingon" ni Carlo.
"Namid-ok si Betty. "Ako man say nagsuporta sa atong mga ginikanan. Puro na god sila retirado. Kulang ilang pension. Daghan nag tambal gipangmintin. Modawat kas akong tanyag o dili?" ni Carlo. Dugay nga nitingog si Betty. Kabiyaon na. "Di man sab ko mamugos kun di ka" ni Carlo. "Nahala god, "ni Betty. Nikangkang sa iyang kamot. Nipahiyom na. (Kataposan)
- Latest
