Mabaw ra'g kalipay

Mura man ko'g giilogan sa truno sa akong bayaw! Komentaryo ni Eric ning sayong kahapunon, adlaw'ng Domingo samtang naglili sa bintana. Nakita niya nga naglakaw daplin sa karsada iyang tatay Vencio kuyog ni Romy bana ni Mira manghod ni Eric.

May sagol mahay ang tunada sa pulong ni Eric nga nilingi sa iyang kapikas nga si Cora nagtan-aw og tv sa ilang sala.

Magtutudlo sa saring publiko ang magtiayong Eric ug Cora. Ilang tatay Vencio biyudo na ug dako'g pension kay retirado nga tasador sa ilang lungsod. Si Romy accounting clerk sa Green Meadow Forwarders ug nagsige pagtungha og accountancy. Wa pay tuig iyang kaminyuon ni Mira. "Sabta na lang nang imong bayaw nipakisama lang siya's iyang ugangan. Nipakisama man sab siya nimo di ba?" ni Cora. "Bitaw wa man ko'y ikasaway ni Romy, hingamigo man siya pero gilainan lang kong tatay. Sukad naa na siya'y umagad, nawani na ko," ni Eric. Sa ako sang tan-aw mas enjoy si tatay kun si Romy iyang kuyog, komedyante si tatay, estoryador, hingantahon. Kusog mokatawa si Romy sa mga jokes ni tatay. Ikaw mangyamiid kun mokanta si tatay. Maduyogan ni Romy sa sista. Usahay kun kasuroy sa ilang Epeng, piano pay maduyog," ni Cora.

"Mao sab nagkatakdo ilang mga talento," ni Eric. Maayo man sab ka mokanta, kanunay gud kang hagdon ni Romy og dyaming ikaw ra may mobalibad, ni Cora. Nagsige la'g atubang sa tv nakasabot na kong tatay adto siya kuyog sa kamao mopahimuot niya, ni Eric. Korek ka diyan kay kun ikaw makuyog ni tatay insulto ra may kanunay niyang mahiaguman, ni Cora napatiurok si Eric naghinuktok.

"Sunod unya namong pundokpundok ako nang pahimut-on si tatay di na nako insultohon, mokatawa na ko's iyang mga jokes, bisa'g kapila na gisubli og estorya," ni Eric nipahiyom. Kanay insakto, mabaw ra man na'g kalipay ang tiguwang ni Cora pa. Gisundan gihapon ni Eric og tan-aw ang nagkalayo nga duha ka lalaki ugangan ug umagad daw best friend nga nagkuyog. (Kataposan)