Fr. John

Nahimong bisita ni Father John ang usa sa mga benefactors sa ilang parokya usa ka adunahan sa lungsod. May proyekto sila nga himuon--ang pagpausab sa ilang adoration chapel diin ang usa sa mo sponsor niini mao ang haciendero nga si Don Hilario.

Sukad nga naabot si Fr. John sa maong parokya, daghan nang kausaban ang nabuhat sa maong kura paruko. Gikahimut-an siya halos sa tanang mga parokyano kugihan si Fr. John. Mahigugmaon ngadto sa mga kabus. Gitratar ang matag usa nga way gipinig ug pinalabi kay matud pa datu ka man o kabus, managsama nga mga anak sa Dios. Human sa anticipated mass nianang Sabado, dihang nagpaingon si Fr. John sa sakristiya, misugat kaniya si Cristy nga nagngisi mipahiyom lang sab si Fr. John.

“Fr. mibalik gyud ko kay dili na ko makapaabot kun unsay sunod niadtong panagtagbo pagbalik nilang Carlo ug Sandra. Gusto kong masayud kun nagkadayon ba silang duha,” matud pa ni Cristy. Mikatawa si Fr. John ug nagkanayon, sa sala na lang ta sa kombento magsultihanay Cristy magpahatud ko sa kusinera og matimo nato mas maayo nga magsultihanay ta nga adunay masima-sima,” matud pa ni Fr. John.

“Sige Father,” pulong pa ni Cristy. Busa gidala ni Fr. John si Cristy sa sala sa kumbento. Mipahimutang sa dawatanan og bisita naghisgot una sila’g mga butang nga dili kalabot sa sugilanon ni Carlo. Kalabot sa kalambuan sa parokya, mga proyekto nga gustong sugdan sa pari tinabangan sa mga donors, benefactors ug mga parokyano suod sila si Fr John ug Cristy, usa ka manunulat si Cristy sa usa ka binisaya nga nobela.

“Kun isulat mo man kining maong sugilanon nga akong giasoy kanimo Cristy, usba lang ang mga pangalan,” hangyo pa sa pari.

“Sure Father gusto ko nga mahimoan ko dayon kini og nobela hinaut nga magustohan sa editor ang maong sugilanon ni Carlo pero sure ko nga magustohan gyud ni niya uy,” ni Cristy pa dayong ngisi. Miduol sa ilang nahimutangan ang kusinera nga may dalang matimo-timo nilang duha ug juice. Human mapahimutang ang pagkaon sa center table mibiya ang maong kusinera.

“Diin na gani ta adto, Cris?” ni Fr. John pa.

“Kadtong panagkita pag-usab nila ni Carlo ug Sandra,” pagpahinumdom pa ni Cristy sa pari.

“Ahh okay. Yeah, mao to nagkita sila sa mall,” matud pa ni Fr. John.

“Ang gusto nakong mahibaw-an kun nagkadayon ba sila si Carlo ug Sandra kun wala ba madayon sa iyang pagka pari si Carlo ug naminyo kang Sandra? Di ba, dako man kaayo’g gusto si Carlo kang Sandra, mao usab si Carlo ngadto kang Sandra? Dihang nagkita sila pagbalik, nausab ba ang plano ni Caro kalabot sa pagpari?” mga pangutana ni Cristy. Mingisi una ang pari mikuha sa baso nga may sulod nga juice ug miinom.

“Tinuod nga may gugma si Carlo kang Sandra apan wala kini makapiog sa kagustohan nga mamahimong pari si Carlo,” pasiuna pa ni Fr John sa pag-asoy kalabot sa kinabuhi ni Carlo.

“Nga sa ato pa, nadayon sa pagkapari si Carlo Fr.?” pangutana ni Cristy.

“Oo na ordinahan siya pagka Diakono gidaygan ni Carlo si Sandra sa tinuod niya nga laraw alang sa iyang kinabuhi: Ang kagustohan nga mamahimong pari wala masayod si Sandra sa pagsulod ni Carlo sa seminaryo gani gisultihan ni Carlo ang babaye nga hapit na siyang maordinahi pagkapari. Medyo naulaw ang babaye apan gisabot siya ni Carlo. Unya nag- serbisyo sa simbahan ug ubang komunidad isip diakono si Carlo,” matud pa ni Fr. John.

“Wala na bay mga tentasyon diin nadala si Carlo bisan og diakono na siya?” pangutana ni Cristy. (Sumpayan)