Pinilo nga papel
Agbon, Arnel" ni Miss Panila, maestra ni Arnel sa Social Studies. "Start with your show and tell" sa maestra. Karon pa si Arnel kahinumdum nga sa wa pa ang Christmas vacation, duna diay gihatag assignment ilang maestra.
Nipasangil siya'g ukay sa iyang bag kadiyot. May nisikil nga pinilo nga papel nga gisup-it sa usa ka notebook ni Arnel. Iyang gikuha. Gibukhad. Usa ka pahina sa chordbook nga linaksi. May lyric sa awit nga "Broken, Vow" ang napatik. Gisugo diay siyas iyang mama nga pakopyahan (xerox) ni inig human sa klase.
"Usa ka awit!? Mao ni imong i-show and tell?!" Kundi ka mosugot okay lang. Mohangyo lang ko nga tagai lang ko'g zero. Ay lang nang minus 10", ni Arnel. "Padayon lang", ni Miss Panila. Gitunol og balik ngadtong Arnel ang papel.
"Maayong buntag mga classmates. Mao ra gyud ni akong nadala. Paboritong awit ni mama," niya pa nga naggunit sa papel tungod sa iyang dughan nga nagbutokbutok. Nakita niya ang mga mabiaybiayong tinan-awan sa iyang mga classmates. "Mao ni ang awit nga namat-an nako'g kahayag. Kantahon ni ni mama kun magtiyabaw ko sa kagutom aron makatulog lang bisa'g nagkutoy ang tiyan. Kantahon ni niya samtang magkurikuri sa iyang mga gimbuhaton," ni Arnel. Nahilom iyang mga classmates.
"Awit kini sa pagmahay sa kapakyas sa gugma. Awit kini sa paglaum. Awit kini sa pagpasaylo," ni Arnel. Nakapanglab-ok og laway si Miss Panila. Nipadayon ang kahilom.
"Biktima si mama sa pasalig nga bakak. Ug naglaum gihapon siya nga mobalik ang iyang gimahal. Apan kun dili, andam siyang mopasaylo. Kay kun di siya kapasaylo, mausik lang iyang kinabuhi. Ug maangin ang laing kinabuhi bunga sa iyang pagkadisgrasya. Nagpakabuhi siya tungod ug alang kanako," ni Arnel. Seryoso. Gipilo niya'g hinay ang papel. Daw giugbok nga mga haligi ang iyang mga classmates sa ilang gilingkuran. Hasta sab si Miss Panila. Daghang niduko namahid sa luha. Nilabay ang daghang mga gutling nga nagbarog si Arnel taliwala sa kahilom. (Kataposan)
- Latest
