Halok sa panamilit

Adto nako Ling, ni Pael pa ngadtong Lolita o Loling. Tulo silang nangulitawo sa dalaga apan wala pay gisugot. Apan sa pagkahibawo ni Pael nga si Dario ang gisugot ni Loling mihuot ang iyang dughan. Busa nianang pagkagabii midali siya’g adto sa balay nilang Lolita o Loling. Sa didto na siya, iya dayong gisudyaan ang dalaga sa gibuhat niini nga mao ang pagsugot kang Dario.

“Luoya diay nako no,” ni Pael pa. “Sige lang kay bisa’g wa ko nimo sugta, ikaw man lang gihapon ang akong gimahal...”

“Magminyo na ming Dario sunod buwan,” pahibawo ni Loling ngadtong Pael.

“Okey lang, Ling, unsaon wala man gyud kay gugma nako. Sa adlaw sa imong kasal, Ling, tambongan ko gyud kini,” kahilakon si Pael.

“Sige, Pael, biyaan ta una ka, kay may buhaton pa ko sa kusina,” mibiya si Loling nga misulod sa ilang kusina.

Sa kasal ni Loling ug Dario nianang Sabado sa alas diyes ang takna sa buntag, daghang mga well-wishers sa bag-ong kinasal. Ug dihang nagpalitrato na ang mga kaliwat ni Loling kuyog kaniya sa may dapit duol sa altar sa simbahan kalit lang may miduol kang Lolita ug mihalok kini sa mga ngabil nga nakapauknol sa iyang bana nga si Dario.

“Pael, unsay gibuhat mo nako, kabastos nimo, imong gihagkan ang akong mga ngabil atubangan sa akong bana, ka wa guy uwaw nimo, pahawa diha!” singhag ni Lolita.

“Unsa man ning imo, Bay, pabikil. Dili tika sibogan, kabastos nimo,” kasuntokon si Dario kang Pael apan nagpugong lang.

Halok to sa panamilit nga akong gigasa alang sa babaye nga akong gihigugma bisan og minyo na kini,” ni Pael pa nga kalma kaayong namulong. Unya may giibot siyang usa ka butang sa iyang hawak. Pistola! ug may gisulti si Pael.

“Paminaw mo. Karong orasa, hunosan ko ang akong kinabuhi atubangan sa babaye nga akong gipakamutya.” Ug milanog ang usa ka masipang buto sa pistola.

Nagdinaganay ang mga tawo sulod sa simbahan. Si Lolita ingon sa kandelang giugbok sa iyang nasaksihan sa pag-unay ni Pael sa iyang kaugalingon. Nakahilak si Lolita sa iyang kaugalingon kay karon pa siya makasaksi og usa ka binuhat nga nagpakamatay tungod sa usa ka gugma. Ug ang tanang mga tawo sa simbahan gibati’g kahinuklog sa nahitabo kang Pael nga nagpusil sa iyang kaugalingon tumong sa iyang ulo. (Kataposan)