Ang playboy - Gula 3
Dali ra kaayo nga nasuod ni Caloy ang mga babaye nga gusto’ng magpa-hygiene sa City Health department (STD) section kay nagtuo man sila nga usa g’yud siya ka doktor. Nag-ulhos-ulhos ang mga babaye sa pagsulod sa klinika ni Dr. Benjie.
Miabot ang snack time, migawas si Benjie sa iyang klinika. “Uy, dia ka pa diay Loy? Abi nako’g milakaw ka na,” timbaya sa doktor kang Caloy. “Nagkalingaw lang ko pakig-estorya sa imong mga kliyente Benjie pero molakaw na ko karon,” ni Caloy pa.
Giimbitar ni Caloy ang higala niya nga doktor nga mag-snack sila kadiyot sa canteen. Nakita sa mga babaye nga magpa-hygiene nga nagkuyog si Benjie ug Caloy. Sa canteen, pwerte’ng nakaagik-ik ni Benjie diha nga gitug-anan siya ni Caloy nga gipatuo niya ang mga babaye nga usa sab siya ka doktor.
“Naay usa diha Jie nga bag-o pa kuno siya nga nahimong entertainer sa Wild Orchids bar, gwapa ra ba,” matud ni Caloy. Igo lang mipahiyom si Benjie.
“Amigaha lang kay human og hygiene nila, limpyo dili ka na peligro ug mahimo ka na nga makigdeyt kon magkasabot mo,” matud ni Benjie, dayong tindog kay mopadayon na sa pag-atiman sa iyang mga pasyente.
Mibalik si Caloy paglingkod. Duha na lang ka babaye ang naglingkod kay ang uban didto pa sa canteen nag-snack. May gitawag nga pasyente ang staff ni Dr. Benjie ug mitindog ang usa ka babaye.
Sila na lang si Caloy ug ang gwapa’ng babaye ang nahabilin sa lingkoranan. Gibuak ni Caloy ang kahilom tali kanila. “Kumusta ang trabaho nimo sa Wild Orchids?” ni Caloy pa. “Oki lang dok, pero kapoy kaayo og pamalibad sa mga lalaki nga mohangyo nga ila ko’ng i-out,” sa babaye pa.
“Yuna, puwede nga mailhan ang imong ngalan?” ni Caloy nga milingi sa babaye. “Lowela ang akong ngalan dok,” matud sa babaye nga nagtuo g’yud nga doktor si Caloy. (Sumpayan)
- Latest
