Jezebel - Gula 15

Nagkuyog mi ni Jerome paingon sa school. Samtang nag-ampad mi sa pagpanglakaw, nagpunay usab kami’g sultianay. Malantaw na namo ang eskuwelahan sa dihang mipadayag siya sa iyang gugma kanako. Oo, gipangulitawhan ko ni Jerome.

“Nakalitan ko sa imong gipadayag, Jerome,” matud ko.

“Nasayod kong mao gyud kana ang imong bation,” niya pa. “Ang tinuod, dugay na kong gusto manguyab nimo. Pero nagduhaduha ko tungod sa tabi-tabi sa atong mga classmate nga boyfriend na kuno nimo si Edward. Apan karon namahala na lang ko total, dalaga ka pa man. Wala ka pa man mahigot ngadto ni Edward.”

Wala ko motingog.

“May paglaum ba ang akong gugma, Jezebel?” Sukit ni Jerome.

Taudtaod kong wala magtingog. Naghunahuna ko kon unsay angay nakong itubag kang Jerome nga dili niya ikasilo. Wala ko makagusto bisan gamay na lang kang Jerome. Guwapo man unta siya apan si Edward ra gyud ang akong gihigugma.

“Nagpaabot ko sa imong tubag, Jezebel,” gikan ni Jerome. “May paglaum ba ang akong gugma nga gihalad diha kanimo?”  “Gikasubo ko, Jerome,” matud ko. “Dili ko makahimo sa pagdawat sa imong gugma.”

“Sa unsang hinungdan, Jezebel?”

“May tag-iya na ang akong kasingkasing, Jerome.

“Si Edward ba ang buot mong ipasabot?” - Sumpayan pa