Isla Paraiso - Gula 255

Pag-abot ni sister Veronica sa Orchids Sister’s Convent, gipakigsultihan gilayon niya si Padre Judas. Gisuginlan niya ang pari sa nahitabo sa panagkita nila ni Rey didto sa Isla Paraiso. Ang pari mibati og dili tiaw nga kahinangop pagkasayod sa nahitabo sa iyang lakaw.

Pagkasunod adlaw, madasigon si sister Veronica nga miambit sa mga bulohaton sa kombento. Gilunopan sa kasaya ang iyang kahiladman.

Pagkagabii, sa wala pa matulog si sister Veronica, nag-ampo siya sa Diyos. Nagpasalamat siya nga nakalabang siya sa tanang pagsulay nga iyang nasugatan. Giampo niya nga unta, kun may lain pang pagsulay nga moabot sa iyang kinabuhi, makahimo gihapon siya pagbuntog niini. Giampo usab niya si Rey, nga unta ubanan kini kanunay sa Diyos.

Human makapangamuyo sa Labaw’ng Makagagahom, si sister Veronica mihigda sa mahunolhunol nga kama. Gibati niya karon ang talagsaong kahayahay sa kaugalingon. Natulog siya niadtong higayona nga malinawon.

Milabay ang kapin sa usa ka bulan. Sila si sister Veronica ug Rey wala nay balita sa usa’g-usa. Si sister Veronica libang kaayo sa mga bulohaton sa kombento. Samtang si Rey, nagpabilin sa Isla Paraiso.

Milabay na ang urakan sa kinabuhi ni Rey. Ingon sa dili siya makatuo nga makatugot na siya karon nga nahilayo si sister Veronica kaniya. -- Sumpayan pa