V-hire terminal di sirad-an ni Tommy

CEBU, Philippines - Miduso og resolusyon si Cebu City Councilor Joel Garganera sa ilang regular session niadtong Martes nga nagtinguha sa pagpasira sa v-hire terminal sa Brgy Kamagayan.

Gawas kang Garganera, sila si Konsehal Jun Alcover ug Raymond Garcia, supak sab sa operasyon sa maong terminal.

Si Alcover una nang mihatag og privilege speech pagpadayag sa iyang pagsupak sa terminal ug si Garcia mipasaka og kasong kriminal sa Ombudsman batok kang Mayor Tomas Osmeña ug City Treasurer Tessie Camarillo. Nahimo niyang basehan sa kaso mao nga ang mayor nakalapas sa city ordinance 1958 kun ang pag-regulate sa mga establisemento ug operasyon sa terminal alang sa PUJs ug v-hire.

 Samtang si Garganera miduso og resolusyon nga naglatid nga angayang ipasira ang terminal gumikan sa mga kalapasan.

 Napasar ang maong resolusyon human kini pabori sa mga kauban ni Garganera ubos sa Team Rama, samtang misupak ang pito ka mga sakop sa BOPK ug wala si Konsehal Dave Tumulak atol sa botasyon.

Bisan og napasar ang maong resolusyon, wala’y plano si Mayor Osmeña nga tumanon kini kay matud niya, dili mahimong hunungon ang serbisyo nga nahatag sa maong terminal.

Gihulagway sa mayor nga ang maong terminal usa ka emegency measure sanglit ang siyudad walay accredited nga terminal human gipasirad-an ang Citilink sa miaging administrasyon.

Kahinumduman nga namahayag ang mayor nga ipaubos sa validation ug evaluation ang terminal sa Kamagayan. Karon, laing 60 ka adlaw pa ang gidugang alang sa testing nga himoon sa maong terminal.

Subay niini, si Garganera mihulagway nga ang tumong sa dugang 60 ka adlaw, kini aron paghatag og impresyon kanila nga city-operated ang terminal human giingong nasakpan nga lain ang nagdumala niini.

Gitubag sab ni Garganera ang isyu kabahin sa accredited nga terminal diin sigon niya, sukad sa paglingkod sa mayor, giingong wala ma-convene ang accreditation committee ug kun gihimo pa kini sa mayor, nahatagan unta kini og solusyon. (BANAT NEWS)