Vice mayor, bodyguard nirapido, patay
NORTH COTABATO, Philippines – Kamatayan ang sinapit ng 46-anyos na vice mayor at tiyuhin na tumatayong bodyguard nito makaraang ratratin ng hindi kilalang lalaki sa loob ng kanyang bahay sa Barangay Madia sa bayan ng Datu Saudi Ampatuan sa Maguindanao kahapon ng umaga.
Naisugod pa sa bahay-pagamutan subalit idinekla-rang patay sina Datu Saudi Ampatuan Vice Mayor Anwar A. Sindatok at Sela Menamdang, 58, mga nakatira sa nasabing barangay.
Base sa police report, nag-uusap ang mga biktima nang pumasok ang gunman saka nagsimulang mamaril gamit ang cal. 5.56 rifle bandang alas-8:45 ng umaga.
Kaagad namang tumakas ang gunman lulan ng motorsiklo.
Sinisilip ng mga imbestigador ng pulisya ang anggulong rido o clan war ang isa sa motibo sa pamamaslang.
- Latest