Park ‘n Go solo lider na’s Power Forty President’s Cup

CEBU, Philippines - Nagsolo na karon sa liderato ang Park ‘N Go Bakeshop human midaog batok sa Krisha Hynes, 90-84 sa Power Forty President’s Cup  basketball tournament sa miaging gabii didto sa Inayawan Sports Complex.

Ang Park ‘N Go nga nagbitbit na og 3-0 gipangulohan ni Michael Arias nga mipabuhagay og 15 puntos, gisundan ni None Sabandeja nga adunay 11 puntos, samtang sila si Celso Cabaluna, Al Misa, Atan Diaz ug Eric Chiong nagtampohay og 10 puntos aron makuha ang tungason nga daog.

Si Nando Sumargo miposa og 21 puntos aron pangulohan ang Krisha Hynes nga pabiling bokya sa tulo nila ka duwa.

Abante unta ang Krisha Hynes sa first period, 23-16, apan mikolapso sila sa second quarter hinungdan   nailog sa Park ‘N Go ang labaw sa halftime, 44-39.

Si  Hermes Abasolo mitimbre og 13 puntos sa Krisha Hynes, samtang sila si Simoy Yosores ug Alex Ybiernas mitampo’g 12 ug 10 puntos matag usa sa pilderong koponan.

Sa laing aksiyon, ang AMBL mikulit sa ilang ikaduhang sunod-sunod nga daog human makaipsot batok sa Power Forty Selection, 83-78.

Gipangulohan ang kadaugan nilang Robert Abasolo ug Alex Ocariza nga parehong mipatik og 20 puntos. Wala sab magpaalkanse si Bowen  Canarias, kinsa mikadlit og 17 puntos sa AMBL nga nahimutang karon sa ikaduhang dapit sa standing ug ang Water Market nga nagbitbit og managsama nga baraha, 2-0.

Tulo sab ka players sa Power Forty Selection ang miiskor og double figures pinangulohan ni Jun Abapo sa iyang 22 puntos. Sila Peter Pabillon ug Teody Ebrado  miantog og 14 puntos matag usa alang sa ilang koponan nga wala gyud kadaog sa duha ka duwa.

Puntos matag usa

Unang duwa:

AMBL (83) – Abasolo 20, Ocariza 20, Canarias 17, Kalinga 7, Cabatas 6, A. Gaviola 5, Cabrera 4, C. Gaviola 4.

Power 40 Selection (78) – Abapo 22, Pabillon 14, Ebrado 14, Lapulapu 7, Cantarona 6, Fuentes 5, Ungria 4, Atillo 4, Abellanosa 2.

Ikaduhang duwa:

Park ‘N Go Bakeshop (90) – Arias 15, Sabandeja 11, Cabaluna 10, Misa 10, Diaz 10, Chiong 10, Rama 9, Mosqueda 8, Pestaño 4, Balansag 2.

Krisha  Hynes (84) – Sumargo  21,  Abasolo 13,   Yosores  12, Ybiernas 10,    Traya  9, Fernandez 9,  Carbonilla  8, Sandal 2. (BANAT NEWS)