Upat sikop sa buy-bust operation
CEBU, Philippines - Upat ka mga gipasanginlang nalambigit sa ilegal nga drugas ang napuno karon sa naghuot na nga prisohan nunot niining padayong gipangusgang kampanya kontra ilegal nga drugas. Nadakpan sa mga sakop sa Philippine Drug Enforcement Agency (PDEA)-7 ang 34 anyos nga si Jimeno Solitario alyas Bordz taga Holy Name, Mabolo human kini nibaligya og drugas sa mga ahente diha sa dalan F. Ramos Street ning dakbayan.
Ang Public Information Officer sa PDEA-7, Leia Albiar miingon nga dinhi sa dakbayan ang operasyon ni Solitario ug base sa impormasyon 150 hangtud 300 gramos nga shabu ang madispatsar niini. Nakuha gikan niya ang shabu nga mikantidad og P12 mil. Samtang sa laing operasyon, nasikop usab sa mga sakop sa Carbon Police sa Cebu City Police Office ang 18 anyos nga lalaki nga si Charles Kabalikan nga nakuhaan og P130 mil nga kantidad sa shabu atol sa anti-drug operation diha sa Sitio Ermita Proper, Barangay Ermita.
Samtang sa Dakbayan sa Lapu-Lapu nadakpan sa Barangay Canjulao si Aljun Mar Berame, 27, atol sa operasyon sa grupo ni Senior Inspector Felix Cleopas ug nakuhaan kini og upat ka gagmay nga putos sa shabu.
Pagka-alas tres sa kaadlawon laing buy-bust operation nahitabo sa may Sitio Bagumbayan, Barangay Maribago nga niresulta sa pagkasikop ni Niecel Paquibot alyas Rustom, 31.
Si Paquibot kanhi drug surrenderer sa nilabay nga tuig apan matud pa ni PO3 Aaron Gevera, ilang gimonitor Si Pacquibot ug ilang nasayran nga nibalik kini sa iyang pagpayuhot og ginadili nga drugas hinungdan nga gipahigayon ang operasyon. Jojo Ugdol, Rowena Capistrano ug Romeo Limpangog (BANAT NEWS)
- Latest