“Illegal fishing free” target sa Kapitolyo

CEBU, Philippines - Ang ika-upat nga distrito sa probinsiya maoy gisentro sa Kapitolyo sa  programa batok sa ilegal nga panagat. Giingong sa mga lungsod sa nahisgutang distrito, padayon nga mikuyanap ang ilegal nga panagat matud sa hepe sa Cebu Provincial Anti-Illegal Fishing Task Force (CPAIFTF) nga si Lyndon Ruiz.

Ang ika-upat nga distrito gilangkuban sa mga lungsod sa Bantayan, Daanbantayan, Madridejos, Medellin, San Remigio, Santa Fe, Tabogon, Tabuelan ug Dakbayan sa Bogo.

Matud niya nga niadtong buwan sa Pebrero, gilusad nila ang “Kalamboan sa Dagat” diin campaign plan kini batok sa ilegal nga panagat.

Tumong sa maong kampanya nga human sa upat ka tuig, ang tanang distrito sa probinsiya madeklara kini nga “illegal fishing free”.

Lakip sa maong 4-year campaign plan, migama usab sila og operation plan alang lang sa ika-upat nga distrito.

Gipasabot ni Ruiz nga ubos sa maong plano, aduna sila’y gihimo nga mga programa lakip na niini ang livelihood. Tumong niini nga makabaton og alternatibong panginabuhian ang mga mananagat panahon nga dili sila makapanagat. Naglakip sa ilang kat-onan mao ang pagbuhat og sabon ug kandila.

Matud ni Ruiz nga dunay panahon nga kinahanglan usab nga paginhawaon ang dagat aron ang mga isda niini dili mapuo o mahatagan og kahigayonan nga modaghan na usab aron dunay makuha ang mga mananagat.

Giingong dili lang pulos dakop ang ilang himuon ngadto sa mga mananagat nga nalambigit sa ilegal nga panagat kay gawas sa livelihood, edukahon usab nila ang mga mananagat sa ka importante sa kalikupan ug kun ila kining gub-on o abusohon, sa umaabot wala na unya’y makuhaan og panginabuhian ang mosunod nga henerasyon.

Gibutyag ni Ruiz nga sa mao nilang kalihukan nakigtambayayong sila sa uban pang ahensiyang hingtungdan sama sa mga lokal nga kagamhanan, kabarangayan, Department of Environment and Natural Resources, Bureau of Fisheries and Aquatic Resources ug uban pa. Dugang ni Ruiz nga ang maong tahas dili sayon apan ilang paningkamutan nga mahimong “illegal fishing free” ang tibuok probinsiya human sa upat ka tuig. (BANAT NEWS)