Duterte tambong sa CCLEX ground-breaking

CEBU, Philippines - Motambong gyud si Presidente Rodrigo Duterte sa groundbreaking sa Cebu-Cordova Link Expressway karong Marso 2 sa alas 2 sa hapon sa may Dapitan-Pilipog area sa Lungsod sa Cordova.

Kini ang gikonpirmar ni Presidential Assistant for the Visayas Michael Lloyd Dino.

Mismo ang presidente sa Metro Pacific Tollways Development Corporation, Rodrigo Franco, ang nipadala na og imbitasyon sa mga opisyal sa Dakbayan sa Sugbo ug Lungsod sa Cordova alang sa maong kalihukan.

“President Rodrigo R. Duterte has signified his interest to participate in the groundbreaking event,” matud sa suwat ni Franco.

Matud ni Dino nga wala’y problema kaniya kung motambong si Cebu City Mayor Tomas Osmeña tungod kay kinahanglan man siya naa sa maong kalihukan kay anaa man ang presidente ug usa lang siya ka suluguon.

Si Cordova Mayor Mary Therese Sitoy-Cho una na nga nipahibawo nga madayon gyud ang groundbreaking mutambong man o dili si Duterte. Rowena D. Capistrano ug Gregg M. Rubio (BANAT NEWS)