3 pang suspect sa bigong US Embassy bombing tugis
MANILA, Philippines - Tinutugis ng mga otoridad ang tatlo pang suspect sa bigong pagpapasabog sa US Embassy habang isinailalim naman sa terror alert level 3 ang buong bansa.
Inihayag ni PNP Chief P/Director General Ronald “Bato” dela Rosa na itinaas na sa ‘terror alert level 3’ ang bansa kasunod nang pagkakaaresto sa dalawang responsable sa pagtatanim ng bomba sa harapan ng US Embassy sa Roxas Boulevard noong Nobyembre 28.
Iprinisinta sa media ang dalawa sa mga nasakoteng suspek na sina Rayson Kilala alyas Rasid, 34; na nahuli sa Bulakan, Bulacan at Jiaher Guinar, 30, tubong Marawi City, Lanao del Sur na nahuli sa Brgy. Bagong Silang, Caloocan City.
Ayon kay Dela Rosa, positibong itinuro ng isang testigo na si Guinar ang naglagay ng Improvised Explosive Device (IED) sa basurahan sa harapan ng US Embassy habang si Rasid naman ang nagmaneho ng behikulong sinakyan ng mga ito.
Sa ilalim ng ‘terror alert level 3’ ay paiigtingin muli ang mga mobile checkpoints at asahan na ang Oplan Sita anumang oras habang maglulunsad din ng mga raids.
- Latest
