EDITORYAL - Makinarya sa sindikato

Naghinamhinam karon ang publiko pagpaabot sa kun unsay nasulat sa “blue book” ug “pink book” mga ipangbutyag unya sa gipasanginlang numero unong druglord sa Eastern Visayas nga si Kerwin Espinosa.

Si Kerwin nga higpit karong gibantayan sa kapolisan sulod sa PNP Holding Center sa Camp Crame, gipasaligan nga wa’y dautang mahitabo kaniya, dili sama sa nahitabo sa amahan niini nga si kanhi Albuera mayor Rolando “Daddy Onik” Espinosa Sr.

Bisan wala magtingog-tingog ang mga tawo, apan masabtan kaayo nga gusto usab sila nga maparehas og dangatan si Kerwin sa iyang amahan tungod sa pagtuo nga sad-an kini.

Si Kerwin daan na nga misaad nga mobutyag sa tanang nahibaw-an kun kinsa ang mga sakop sa ilang sindikato. Sindikato tungod kay dili na mga drug pushers lang ang nagpadagan sa makinarya sa illegal drugs.

Usa ka opisyal sa kapolisan kaniadto ang mibutyag nga matawag nga sindikato ang operasyon sa mga ilegalista kun ang makinarya niini dunay nalambigit nga ubang mga gamhanang tawo nga dili direkta nga maoy naghimo sa krimen.

Sa kaso sa pagbaligya og ilegal nga drugas, ang mga kaparehas ni Kerwin maoy direkta nga nagbaligya uban sa mga drug pushers sa kutay sa ilang network, apan nakabenepisyo gihapon sa operasyon kadtong mga tawo nga inpluwensyado, o may gahum.

Kini sama sa proteksyon nga gihatag sa mga narco-politicians, proteksyon sa kapolisan, ang pagmaniobra sa mga kaso nga ang makabuhat mao lang ang mga anaa sa hudikatura.

Bisan ang media nasudlan na niini aron mas dali nga pahilomon ang mga isyu nga angayan unta nga ibutyag sa publiko, apan tungod sa kuwarta dali ra nga mobugnaw ang mga balita.

Ang pangutana karon, kinsa man kaha kining mga tawo nga naapil sa makinarya ni Kerwin? Kinsa kaha sa mga inpluwensyadong mga tawo, dili lang sa Eastern Visayas, kun dili, hasta sa Central Visayas ug ilabi na sa Cebu nga nakasapi sa ilang operasyon?