Mojdeh bumandera para sa PSL tankers

TOKYO - Kumubra ng anim na ginto at dalawang pilak na medalya na pinaningning ng pagwasak sa apat na record si Michaela Jasmine Mojdeh para pangunahan ang apat na iba pang Pinoy tankers na isinabak ng Philippine Swimming League (PSL) at kinilalang Most Outstanding Swimmers sa pagtatapos ng 2016 Buccaneer Invitational Swimming Championship sa St. Mary’s International School swimming pool dito.

Tampok sa panalo ni Mojdeh na mag-aaral ng Immaculate Heart of Mary College-Parañaque ang paglunod nitö ng mga marka sa girls’ 9-10  200m Individual Medley (2:44.23), 50m butterfly (33.07), 100m butterfly (1:11.95) at 100m IM (1:15.86).

Pinangunahan din ni Mojdeh ang girls’ 9-10 200m medley relay (2:40.41) at 200m freestyle relay (2:21.49) sa pagkopo ng gintong medalya kalakip ang mga bagong marka habang nakapagbulsa rin ito ng pilak sa 100m freestyle at 50m breaststroke.

Magarbo rin ang kampanya ni Marc Bryan Dula ng Weisenheimer Academy na umani ng ginto sa 50m butterfly (35.49) at 50m backstroke (37.91), pilak sa 100m backstroke (1:24.19), at tanso sa 100m breaststroke (1:39.37) at 100m butterfly (35.49) para masungkit at pagharian ang boys’ 9-10 event.

Winalis ni Hope Christian School-Legazpi bet Trump Christian Luistro ang lahat ng kaniyang indivi-dual events upang kubrahin ang MOS sa boys’ 8-under. Humataw ito sa 25m freestyle, 50m breaststroke, 25m butterfly, 50m freestyle, 25m backstroke at 100m IM.

Humakot naman si Rio Lorenzo Malapitan ng Divine Word College of Calapan ng apat na ginto, isang pilak at isang tanso para mangibabaw sa boys’ 11-12. Namayagpag si Malapitan sa 100m breaststroke, 50m butterfly, 50m breaststroke at 100m IM habang naka-pilak ito sa 50m freestyle at tanso sa 200m IM.

Hindi rin nagpahuli si Kyla Soguilon ng Sun Yat Sen School-Kalibo na may isang ginto at apat na pilak sa individual events at dalawang ginto sa relay - sapat para makuha ang MOS award sa girls 11-12 class.

“It’s a job well done for our young swimmers. We would like to thank all personalities and groups who helped us in this endeavor especially Sen. Nikki Coseteng, Commodore Dante Jimenez of the Violence Against Crime and Corruption, Philippine Sports Commission William “Butch” Ramirez, and parents and coaches,” ani PSL President Susan Papa.

Humakot ng 25 ginto, 17 pilak at 15 tanso ang PSL tankers kasama ang pitong bagong rekord upang masungkit ang ikalawang puwesto sa overall. BRepizo-Meraña