Republic Act 4136 bag-ohon
Angay gyud nga himoan og kausaban ang Republic Act 4136, ang Transportation and Traffic Code, aron hatagan og gahum ang mga traffic enforcers nga sakmiton ang lisensya sa mga drayber nga makahimo og salaod bisan og wala sila'y Temporary Operators Permit (TOP).
Pagka karon gud, ang mga traffic enforcers sa lainlaing local government units (LGU), wala gyud gi-deputize sa Land Transportation Office (LTO) kay kuno dili man mga regular employees. Mao nga ang mga traffic enforcers nigamit ra og traffic citation ticket.
Ang kalainan niini mao nga dili masakmit sa mga traffic enforcers ang lisensya sa mga masalaypong drayber kon TCT ra ang iisyu kay ang Republic Act 4136 naglatid man nga masakmit ra ang lisensya sa mga drayber kon pulihan kini og resibo nga gikan sa "LTO."
Ang resibo nga gipasabot sa balaod, mao ang mga TOP. Awhagon nako si Kongresista Rodrigo Abellanosa ug si Kongresista Raul del Mar nga sila maoy moduso niini og sugyot nga usbon ang atong Transportation and Traffic Code.
Unya, ang kadagkoan sa LTO kinahanglan usab nga mohimo'g paagi aron epektibo sila nga manakop sa mga masalaypong drayber. Kon ang ilang paagi dili moisyu og TOP sa mga casual, apektado usab sila kay kuwang sila og regular employees sa ilang operations branch.
Pagka karon upat lang ka regular nga kawani sa LTO ang gidestino isip road law enforcers aron manakop sa masalaypong drayber, mao nga ang mga badlungong drayber misiaw pag-ayo.
Kon TOP gud maoy gamiton sa pagdakop sa mga masalaypong drayber, mahadlok gyud ang mga motorista sa paghimo og salaod kay kon masakmit ang ilang lisensya mapugos man gyud sila paglukat niini.
Apan kon traffic citation ticket ra gani ang gamiton pagdakop sa masalaypong drayber, mahimo ra man nga dili lang dayon bayaran ang multa, ilabi na kon dili dayon ikiha ang mga drayber nga dili mo-settle sa ilang multahanan.
* * *
Wala malilong kanato nga samok kaayo ang atong mga aseras tungod kay gigamit kini sa pagpaninda, ayuhanan sa mga motorsiklo ug parkingan sa mga sakyanan.
Nganong naingon man kini niini? Ang tubag mao nga kuwang sa paningkamot ang atong Probe team sa City Hall aron hawanan ang atong mga aseras, ingon man ang Cebu City Transportation Office wala na moabag sa paglimpyo sa aseras.
Ang tukma gyud unta nga balikon ang sistema kaniadto nga ang CCTO, kanhi CITOM, magmugna og team nga ang tahas mao ang pagsakmit sa mga baligya nga nakabalda na sa pag-agi sa mga tawo diha sa aseras.
Karon gud, ang sistema sa CCTO, igo ra sila nga moingon nga abi kay ang aseras man ang giukupar sa mga mapahimuslanon, dili na kuno ilang trabaho kay sa Probe na kini nga tahas.
Unsaon man sab gud kining Probe nga wala man sa'y lihok aron hawanan ang mga aseras. Ang nakanindot gud kon balikon ang pagmugna og team sa CCTO nga mohawan sa aseras, ang mga tawo anha na sa aseras moagi, ug dili na kay sa karsada sila molakaw.
Sa ato pa, molapad na ang karsada ug makapaspas na ang mga sakyanan sa pagdagan. Ambot, kanus-a pa kaha kita makakita og tawo nga modumala sa PROBE nga susama ni Bayani Fernando.
Unsaon, hangtod karon wala pa man motudlo si Mayor Tomas Osmeña og mga sakop sa CCTO Board. Apan mao sab lagi, kon duna nay matudlo nga sakop sa CCTO Board, ang pangutana, sensiro gyud kaha sila nga motrabaho?
Makapangutana ko kon nganong gihatagan man og clearance sa CCTO Board ang mga balay patigayon nga nahimutang daplin sa karsada nga naghimo og parking area nga "diagonal type"?
Ang ordinansa sa dakbayan naglatid nga kadtong mga building nga gitukod lapas na sa 1994, kinahanglan nga ang ilang parking area "parallel" na sa bungbong ug adunay entrance ug exit, apan wala kini tumana.
- Latest
