Hostage-drama: Suspek utas, 2 sugatan
CAVITE, Philippines – Kamatayan ang sinapit ng 33-anyos na hostage-taker na sinasabing nanaksak ng dalawang bihag matapos itong barilin ng mga tauhan ng pulisya sa naganap na hostage-drama sa Barangay Salitran 1 sa Dasmariñas City, Cavite noong Sabado ng hapon.
Kinilala ng pulisya ang hostage-taker na si Peter Adricula, 33, ng Phase 2 sa Regina Ville 2000 sa Barangay Inocencio saTrece Martires City, Cavite.
Ginagamot naman sa Emilio Aguinaldo Medical Center sina Marian Tarazona, 20; at Janielsa Fajanil, 8, habang nakaligtas naman si Jeremiah Fajanil, 1, mga nakatira sa Rembulat Compound sa nasabing barangay.
Base sa police report na nakarating sa Camp Pantaleon Garcia, pinasok ni Adricula ang residential compound saka nagtuloy sa apartment ng mga biktima bandang alas-2 ng hapon.
Gayunman, hinostage ni Adricula ang tatlo kung saan nakikipagnegosasyon ang mga awtoridad ay pinakawalan si Jeremiah bandang alas-3 ng hapon.
Napagtanto ng pulisya na wala sa katinuan si Adricula matapos itong mag-demand ng sasakyan at television crew.
Bandang alas-5:45 ng hapon nang magsimulang saksakin ng susperk ang dalawang biktima kaya napilitang pagbabarilin ito ng pulisya.
Naisugod pa sa Pagamutan ng Dasmariñas si Adricula subalit idineklarang patay habang nagtamo naman ng ilang saksak ang dalawang biktima subalit nasa mabuti namang kalagayan.
- Latest
