City scholars makapadayon bisan hagbong

CEBU, Philippines - Gitataw ni Konsehal Joy Augustus Young nga ang mga scholar sa Dakbayan sa Sugbo nga may hagbong nga subjects mahimo gihapon nga magpadayon isip city scholar apan kinahanglang moeskuwela sila pagbalik sa maong subject ug sila ang mobayad.

Ang katin-awan, giluwatan ni Young tungod kay daghang ginikanan sa mga city scholars nga nagpakisayod niini apan walay nakahatag og tukma nga pagpasabot kanila. Kini maoy rason nga dunay mga city scholars nga wala na lang mopadayon sa pagtungha tungod kay wala man sila kaayo makasabot sa ilang sitwasyon. Adunay kaliboan ka tinun-an dinhi sa dakbayan nga gihatagan og tag P20 mil nga scholarship program.

Samtang, laing isyu nga gihatagan og katin-awan ni Young mao nga kadtong mga tinun-an sa mga public high schools nga kinahanglan gyud nga adto sa private schools mokuha sa ilang senior high school, covered gihapon sila sa scholarship program sa dakbayan kun mo-graduate.

Daghang ginikanan ang nabalaka niini tungod kay ang scholarship program sa dakbayan naglatid lang nga kadto ra nga mga graduates sa public schools maoy madawat sa scholarship nga gipasiugdahan sa siyudad.

 Matud ni Young nga ang mga tinun-an nga gikan sa public high schools ug adto mokuha sa ilang senior high school sa mga private schools, covered gihapon sa scholarship program.

Gipasabot ni Young nga kadtong mga tinun-an nga gikan sa public high schools nga mopadayon pagtungha sa private high schools, may madawat nga subsidy gikan sa national government sa kantidad nga P20 mil sa usa ka school year.

Kini maoy hinungdan nga inig-graduate sa maong mga tinun-an maisip gihapon sila nga gradwado sa public high school bisan og didto sila mihuman sa ilang senior high school sa pribadong tunghaan. (BANAT NEWS)