3 utas sa riding in tandem
MANILA, Philippines - Tatlong katao ang naiulat na binaril at napatay ng mga riding-in-tandem criminals sa magkahiwalay na lugar sa Maynila at Quezon City.
Hindi na umabot ng buhay sa Sta. Ana Hospital ang biktimang si William Lopez, 32, binata, ng Road 16, Fabie Estate, Sta. Ana, Maynila nang buntutan ng mga suspek na sakay ng motorsiklo kahapon ng alas-2:00 ng madaling araw habang ito ay naglalakad sa nasabing lugar.Hindi pa tukoy ang pagkakilanlan ng mga suspek.
Sa Quezon City, dalawang katao ang naiulat na nasawi nang pagbabarilin ng riding-in-tandem criminals sa magkahiwalay na barangay.
Nakilala ang mga nasawi na sina Michael Angelo Napoles, 19, ng Phase 3, Block 5, Lupang Pangako, Brgy. Payatas B, QC; at Jayson San Diego, 39, ng Block 6, Lot 13, Verbera St., Brgy. West Fairview
Base sa pagsisiyasat, dakong alas-11:00 ng gabi nang atakehin ng riding-in-tandem criminals ang biktimang si Napoles sa may kahabaan ng Phase 3, Block 6.
Dakong alas-12:00 ng madaling araw nang barilin naman ng isa sa apat na suspek na sakay ng dalawang motorsiklo si San Diego sa may kahabaan ng Dahlia St., kanto ng Regalado Avenue, Brgy. Greater Fairview, QC.
Kasalukuyan nakatayo sa lugar ang biktima nang dumating ang dalawang motorsiklo na walang plaka sakay ang mga suspek at bumaba ang backrider at binaril sa ulo ang una.
- Latest