Pagbiya sa Boracay
May higala ming taga-Boracay nga human sa 25 ka tuig nga pagpuyo sa isla nakahukom sa pagbalhin na og puyo sa Manila. Dagko nang iyang mga anak ug busa angay nang pa-eskuylahon sa mas maayong mga eskuylahan sa kaulohan. Nahugno sang iyang kaminyuon busa naibanan og usa ka higot sa pagpabilin sa Boracay.
Apan ang labing dakong hinungdan sa iyang pagbiya mao ang kahugaw na sa isla. Nanag-iya siya og luna nga nihatag niya sa niaging duha ug tunga ka dekada sa labing maanindot nga talan-awon sa Boracay. Apan di lang siya ganahan nga motuslob sa kumagko sa iyang tiil sa lang-og nga dagat.
***
May mga adlaw nga mosugat sa ilang panimhot inig mata sa sayong buntag ang baho sa kemikal ug kalang-og. Nga nakapakumbinser niya ug sa mga sakop sa iyang pamilya sa pagsuway sa lokal nga mga opisyal sa gobyerno sa pag-atiman sa basura sa isla apan di lang paigo ang ilang paningkamot.
Apan may mga adlaw sab nga makasimhot sila og kabaho nga labihan kalunsay ug kabantok. Nga nakapakumbinser nila nga wa g'yud mosuway ang lokal nga mga opisyal sa paggamit sa taphaw nilang wastewater treatment facility.
***
Nipasigarbo ang mga opisyal sa munisipyo sa Malay sa Aklan nga mao'y nagduma sa Boracay nga naablihan nang ikaduha nilang P570-milyones nga sewage treatment plant sa Barangay Manocmanoc nga makalimpiyo og dugang lima ka milyon ka litro sa basurang tubig matag adlaw.
Puno ni sa unang facility sa Barangay Balabag nga may kapasidad sa paglimpiyo og unom ka milyon ka litro sa hugaw’ng tubig gikan sa kabalayan, hotels, resorts ug ubang patigayon matag adlaw. Nagtinguha sila paglimpiyo og dugang 3.5 milyones ka litro karong tuiga.
***
Apan nagpabiling taas nga ang-ang sa coliform bacteria, ang kagaw gikan sa hugaw sa tawo, nga nasukod sa Environmental Management Bureau (EMB) sa Kasadpang Kabisay-an sa kadagatan sa Boracay.
Nagpabilin hinuong masaligon ang Department of Tourism (DOT) nga malabwan karong tuiga ang 1.7 milyones ka turista nga nidagsa sa Boracay sa niaging tuig. Kumbinsido hinuon ang among higala nga di na himsog alang sa iyang mga anak ang pagpabilin sa isla.
- Latest
