15-anyos napusilan, bala nilapos sa tiyan
CEBU, Philippines - Kritikal ang kahimtang sa 15-anyos nga lalaki human gipusil sa duha ka lalaki nga nagsakay og motorsiklo sa Mananga 2, Tabunok, Dakbayan sa Talisay niadtong niaging gabii.
Ang biktima mao si Jhon Vincent Gamboa, nagpuyo sa nahisgutang lugar.
Si PO2 Ramonito Dinapo sa Talisay City Police Station nagkanayon nga gikan sa Tabunok Public Market ang biktima uban sa iyang mga higala. Samtang sila naglakaw padulong pauli, nikalit og hunong ang motor nga gisakyan sa duha ka lalaki dayon pusil ngadto sa biktima.
Naigo sa buko-buko ang biktima ug nilapos ang bala sa tiyan samtang nagkatibulaag ang ilang grupo.
Ang mga suspek nisutoy padulong sa habagatang bahin samtang ang biktima gidala sa Talisay City Hospital ug gibalhin sa tambalanan sa Siyudad sa Sugbo.
Nasayran nga sa niaging mga buwan nagkarambola ang grupo sa STY diin sakop ang biktima ug laing grupo sa mga batan-on.
Gani nadala sa tambalanan ang duha ka sakop niini tungod kay nadunggaban. - /GMR) (BANAT NEWS)
- Latest
