Mga ideya ni Coach Chot

Walang balak si balik-Gilas coach Chot Reyes na magpapetik-petik sa 2017 SEABA Championships dahil kailangan ng Pilipinas ng magandang showing dito para mag-qualify sa 2017 FIBA-Asia Championship.

“Hindi tayo shoo-in sa FIBA Asia. So kung kailangan dalhin si Andray Blatche doon, dadalhin natin,” ani Reyes ukol sa unang torneo na kanilang lalaruin sa kanyang pagbabalik bilang head coach ng Gilas Pilipinas.

Mayroon siyang 25-man pool na paghuhugutan ng mga players na isasama kay Blatche sa mga parating na international tournaments.

Ang 13 ay mga bagong Gilas recruits at ang idadagdag na 12 ay huhugutin isa sa bawat team sa PBA.

Nagpahiwatig si Reyes na sina June Mar Fajardo, Jayson Castro, Terrence Romeo at Calvin Abueva ang mga players na nasa itaas ng kanyang listahan.

May paglalagyan ba sa dose ang mga baguhang Gilas players na sina Mac Belo, Arnold Van Opstal, Kevin Ferrer, Ed Daquiaog, Jio Jalalon, Mike Tolomia, Russell Escoto, Roger Pogoy, Carl Bryan Cruz, Von Pessumal, Alfonso Gotladera, Matthew Wright at Almond Vosotros?

 “I’ll be the first to say I had apprehension, but when I saw them in Iran, grabe! They fought and competed in Iran with very limited practice time, no naturalized player, no experience,” ani Reyes sa pag-alala sa performance ng Gilas cadet team sa nakaraang FIBA Asia Challenge sa Tehran, Iran.

“Grabe! It made me very positive. Several guys on this pool will have a real good shot at making the final 12 even with the PBA guys,” dagdag pa ni Reyes.

Ilalatag ni Reyes ang kanyang programa pagkatapos ng kanyang meeting sa PBA board of go-vernors na nakatakda kahapon.

Pero ipinahiwatig na rin niya na hindi sila aalis sa kanyang dribble-drive game na nagbigay sa Pilipinas ng disenteng pakikipaglaban sa 2014 FIBA World Cup sa Seville, Spain.

“Actually, it’s more of bara-bara. ‘Yun ang laro natin,” aniya sabay halakhak.

Ang target ay mag-qualify sa Tokyo Olympics sa 2020. “One Olympic cycle ang usapan or from now till the next Olympics. But I’m fully aware, if I don’t do a good job between now and the Olympics, I might not be around by the time na dumating na ang Olympics na ‘yan,” ani Reyes.