MOA tali MCWD ipausab ni EddieGul

CEBU, Philippines - Tulo ka konsehal sa dakbayan sa Talisay ang gitudlo ni Mayor Eduardo Gullas nga mohimo og bag-ong Memorandum of Agreement (MOA) tali sa Metro Cebu Water District (MCWD).

Ang maong MOA ipabuhat ni Mayor Gullas nilang Konsehal Richard Aznar, Konsehal Rudy Cabigas ug Konsehal Jojo Bacaltos, kini human nabantayan sa mayor nga alkansi ang siyudad sa bahin.

Buot usab niya ipasubay ang P312 milyones matag quarter nga madawat sa siyudad kay sa iyang pagbana-bana mas daku pa unta ang ilang madawat base sa gikuhang tubig sa MCWD sa Jaclupan dam.

Si Atty. Giovanni Sususco, ang city legal officer sa Talisay niduso na sa iyang rekomendasyon ngadto sa mayor sama sa paghatag og sumada kun nganong makadawat sila sa maong kantidad gikan sa MCWD, kinahanglan nga aduna silay kaugalingong water meter aron sila mahibawo kun pila ang nakuhang tubig ug inbentaryo kun pila ka pumping station ang naa sa Talisay.

Buot sa mayor nga limitahan ang pagkuha og tubig aron malikayan nga parat nga tubig ang makuha inay tab-ang.

 Gusto ni Gullas nga masuplayan og tubig ang taga Talisay ug dili lang ang ubang lugar. Nasayran nga adunay pipila ka barangay sa dakbayan ang wala masuplayi sa MCWD.

 Laing gusto sa mayor mao ang pagbaton unya og representante sa MCWD board aron sila mahibaw sa mga kalihukan sa maong buhatan. (BANAT NEWS)