JM Hayag, 4-2 na sa J&J Surplus Tournament
CEBU, Philippines - Nagkumbinar og 42 puntos sila si Casper Bugtai ug Romnick dela Rama alang sa JM Hayag nga mipahamtang og laing pilde sa Narasaki, 87-82 sa 6th Conference J&J Surplus Ballclub basketball tournament niadtong Miyerkules didto sa Talit’s Garden open court sa Tayud, Lilo-an.
Si Bugtai mikadlit og 22 puntos, samtang si Dela Rama mikulit og 20 puntos sa JM Hayag, kansang kadaugan mipahayag sa ilang kahigayonan pagsakmit sa gidamgo nilang korona.
Sila si Jason Romero ug Carl Villares miabag sab sa kadaugan nga parehong miambit og 12 puntos. Ang JM Hayag ni team owner Bobby Hayag nagbitbit na karon og 4-1 nga baraha.
Ligas pa kaayo ang aksiyon sa nag-unang tulo ka kuwarter, apan pag-entra sa fourth period, ang Narasaki nga kulang og players wala na makalahutay pa hinungdan nga nakadistansiya ang JM Hayag dayon na pagkulit og singko puntos nga kadaugan.
Upat sab ka Narasaki players ang miiskor og double-figures pinangulohan ni Rexon Moneva nga mikabkab og 27 puntos. Si Jessel Gungob miamot og 20 puntos, samtang sila si Ivan Mantuhac ug Jojo Ybañez miantog og 10 puntos matag usa.
Sa laing bahin, ang Blizzard milubong sa Junrey Marketing, 53-40 alang sa ilang ikatulong daog.
Gipangulohan ni Nerio Zafra ang Blizzard pinaagi sa iyang 15 puntos, gisundan ni Rommel Bucatan sa iyang 14 puntos ug Francis Suico nga adunay 12 puntos.
Bugtong si Autentico lang ang miiskor og double figures sa iyang 16 puntos.
Ang liga ubos sa bendisyon ni J&J Surplus ballclub president Henry Agbon, gidumala ni commissioner Fury Trazona uban ni Choy Pilapil.
Puntos matag usa
Unang duwa:
JM Hayag (87) – Bugtai 22, Dela Rama 20, Romero 12, Villares 12, Lofranco 8, Maglasan 8, J. Hayag 2, Pepito 2.
NARASAKI (82) – Moneva 27, Gungob 12, Mantuhac 10, Ybanez 10, Jayven 8, Narasaki 7, B. Salve 6, H. Salve 2.
Ikaduhang duwa:
BLIZZARD (53) – Zafra 15, Bucatan 14, Suico 12, Abatayo 5, Dela Cruz 5, Borres 2, Judilla 2.
JUNREY Marketing (40) – Autentico 16, Arellano 9, S. Wagwag Sr. 5, Cabellon 2, Bano 2, Yrog-Yrog 2. Yoyo R. Abayan (BANAT NEWS)
- Latest
