Resign kun dili kaya

Matag higayon nga moagi ko sa lainlaing karsada, ilabi na dinhi sa dakbayan sa Sugbo, dili ko makapugong sa pagpanglingo-lingo samtang magtan-aw nga ang mga lugar nga alang unta sa publiko gigamit na sa mga mapahimuslanon sa higayon.

Gigamit na sa personal ang mga aseras ug bisan na gani ang kabahin sa mga karsada tungod kay ang mga kawani sa kagamhanan nga gitugyanan unta pagbantay niini, nagduka man ug wala makatuman sa ilang katungdanan.

Nahinumdom pa ba kamo ni Bayani Fernando? Siya ang kontrobersyal kaayong opisyal sa Metro Manila Development Authority (MMDA) nga mipaguba sa mga estraktura nga gitukod sa mga aseras didto sa Metro Manila.

Kanindot unta kun ang itudlo ni Mayor Tomas Osmeña nga modumala sa Prevention Restoration Order Beautification Enhancement (PROBE) Team, susama og panglantaw ni Bayani Fernando.

Daghan kaayong mga dapit dinhi sa dakbayan, ilabi na sa kabarangayan, nga nangahanaw na ang aseras ug ang mga karsada migamay na pag-ayo tungod kay gipasagdan ra man sa PROBE ang mga mapahimuslanon sa higayon.

Ambot nganong mahadlok man gayud sila nga mopatuman sa balaod nga nasayod na man kining mga tawo nga niukopar sa aseras nga sayop ang ilang gihimo?

Akong gihinuktokan pag-ayo kining maong isyu kay daghang lugar dinhi sa dakbayan nga kaniadto may aseras pa nga kalakwan sa mga tawo, apan karon wala na ang maong mga aseras kay gianam-anam og sakop sa panimalay.

Usa sa akong natiman-an nga ang matag kilid sa dalan T. Padilla gikan sa eskena Sikatuna kaniadto, adunay lapad nga aseras. Anaa pa ba gud kana karon? Wala na. Ngano man?

Ang tubag niana mao nga nahanaw ang aseras tungod sa katapolan sa mga sakop sa City Hall demolition team kaniadto. Nag-ilis-ilis lang ang ngalan niini. Gikan sa demolition team, gihimong SPEED, dayon gihimong PROBE, apan walay kalainan ang ilang serbisyo.

Sagad sa mga gibutang nga hepe sa maong grupo, mga retiradong opisyal sa kapolisan, apan imbes makalaom kita og nindot nga serbisyo kay isog unta sila mopatuman sa balaod, mas maayo pa man ang sibilyan.

Kon pananglit unta dili sila makahimo sa katungdanan nga gisangon kanila, mas bentaha pa nga mo-resign na lang kay maglaom ta nga makahimo sila unya diay dili.

Atol nga ang PROBE gipangulohan pa ni Raquel Arce, puwerteng daghana sa mga sakop niini, apan wala gihapon sila makalimpyo sa aseras gikan sa mga babag nga makabalda sa pag-agi sa mga tawo.

Tingali ang kuwang mao ang pagsuperbisar tungod kay kadto si Raquel Arce, bisan og babaye, mohimo kadto og trabaho labaw pa sa usa ka lalaki.

Karon, nasayod ko nga ang hepe sa PROBE mao na usab si Abel Diloy nga retiradong polis. Dakong hagit alang kang Diloy ang paghawan sa mga aseras ug karsada.

Ang pulong "prevention" nagpasabot nga pugngan ninyo ang paghimo og sayop sa mga mapahimuslanon sa higayon, unya ang pulong "restoration" mao nga ibalik ninyo sa naandan pinaagi sa pagbungkag sa mga gitukod na nga illegal structure.

***

Hangtod karon, nagkiyugpos pa ang kapolisan dinhi sa dakbayan sa Sugbo ug diha sa Talisay kabahin sa midagsang nga video karera, moli-moli, ingon man illegal swertres.

Special mention nako ang dakbayan sa Sugbo ug Talisay kay mao kini ang lugar nga sagad i-report kanako gikan sa publiko. Sa Mandaue ug Lapu-Lapu wala pa kaayo ko makadawat og report.

Atensyon Talisay City police chief Aileen Recla ug Cebu City police director Joel Doria, unsay buot ipasabot nga wala man ninyo himoi og aksyon ang ilegal nga sugalan?

Bisan si Mayor Tomas Osmeña nagtuo nga ang mga tigpasiugda sa ilegal nga sugal, sama sa video karera ug moli-moli ingon man illegal swertres, giprotehean sa mga opisyal sa barangay, ug posible sab sa mga polis.

[email protected].