Kasikas sa politika

Taktika ni Mayor Michael Rama nga iyang anam-anamon pagpahibalo kun kinsa ang posible niya nga mga kandidato dinhi sa dakbayan sa Sugbo ubos sa Team Rama.

Tingali gusto lang kuhaon ni Mayor Rama ang sintimento sa katawhan kun andam ba sila nga mosuporta sa mga tawo nga una niya'ng gipahibalo nga kabahin sila sa iyang line-up.

Apan gitataw sa mayor nga hangtud nga ang maong mga tawo dili pa makapasaka sa ilang Certificate of Candidacy adto sa Commission on Elections dili pa gayud maisip nga sila masulod na sa final list.

Ang nakapaikag g'yud nako mao ang pamahayag ni Mayor Rama nga dili gayud niya buhian sa Team Rama si Konsehal Mary Ann delos Santos bisan pa og ang kanhi kapitan sa Lahug gusto nga mag-independent.

Aw, ang tingog g'yud hinuon ni Konsehal Delos Santos diha sa Lahug daku gayud kaayo og epekto sa masi'g pundok. Kun si Mary Ann moawhag nga adto sila mosuporta sa Bando Osmeña Pundok-Kauswagan  alkansehon ang Team Rama diha sa mao nga barangay.

Kun si Mary Ann moawhag 'sab sa taga Lahug nga pabilin sila nga mosuporta sa Team Rama, dili kaayo mabalaka si Mayor Rama. Mao kini rason nga dili gayud gusto ang mayor nga mawala sa iyang grupo si Mary Ann nga nahisama karon og "hot cake."

* * *

Daku g'yud kaayo ang pagtuo ni Kanhi Kongresista Tomas R. Osmeña nga mosutoy lang unya ang popularity rating ni DILG Secretary Mar Roxas karon nga siya na ang gituboy ni Presidente Aquino nga kandidato sa Partido Liberal.

Mosamot na g'yud tingali kun dili na magpapresyo pa si Senador Grace Poe ug mouyon na lang nga magbise siya ni Roxas ug unya na lang siya modagan pagka presidente sa 2022.

Nakasabot man ko nga ang nabalak-an ni Poe mao ang suod niya nga higala nga si Senador Chiz Escudero. Kay kun si Poe mohukom nga siya magbise ni Roxas, asa man si Chiz?

Para kanako dili pa gayud tukma nga si Poe magpresidente sa pagka karon kay kuwang pa lagi kaayo siya og kinaadman kun unsaon sa pagdumala sa atong nasud.

Duha pa lang ka tuig siya nga nahimo'ng senador ug walay kasinatian sa pagdumala sa executive department. Ang lagmit unya nga mahitabo mao nga laing tawo ang magsige'g mandar kaniya ug siya ra ang tigpirma. Mosugot ba kamo niana?

* * *

Sa Talisay, tulo g'yud diay ang magpapili pagka mayor, apil na ni Kanhi Mayor Eddie Gullas. Aw, dili na malalis pa nga sa tulo, si Gullas maoy labing suheto kun unsaon pagpalambo sa Talisay.

Nahimo na gud nga gobernador sa Sugbo, kongresista ug mayor. Napilde lang si Gullas ni Mayor Johny V. delos Reyes tungod sa subra nga kumpiyansa.

* * *

Unya, hangtud karon wala pa gayud mopahibalo si Kongresista Luigi Quisumbing nga moatbang siya ni Konsehal Emmarie "Lolypop" Ouano-Dizon sa pagka mayor sa Mandaue.

Alegre 'sab kaayo ang eleksyon sa Mandaue apan tan-aw nako, bentaha kaayo si Lolypop kay suod siya sa mga masa kay kang Quisumbing nga dili kaayo tigsuod sa mga pobre.

Nakabentaha g'yud niini si Lolypop kay apo siya ni Ingko Pedong nga nahimong mayor sa Mandaue sulod sa dugay'ng katuigan unya anak pa usab siya ni Teddy nahimo usab nga mayor.

Unya, walay anomaliya si Lolypop nga magamit pagdaot sa iyang kandidatura unya. Nalantawan nako nga kadtong pagkalambigit sa ngalan ni Luigi sa PDAF scam molutaw na 'sab unya sa kampanya.

* * *

Sa dakbayan sa Lapu-Lapu, maayo kay nahunong na kadtong tinguha ni kanhi kongresista Arturo "Boy" Radaza nga gusto niya nga ilogan og puwesto ang iyang asawa nga si Mayor Paz Radaza.

Kun modayon si Boy niadto daku'ng kauwawan ang iyang mahiaguman nga mapilde siya sa kaugalingon niya nga asawa. Nasayod ko nga mas pinangga si Paz sa mga tawo sa Lapu-Lapu.