Taras nilang Binay ug Roxas
Sa daghan na nilang balikbalik sa Sugbo, silang Bise Presidente Jejomar Binay ug Interior Secretary Mar Roxas nipasundayag sa mosunod nga mga taras ngadto sa mga sakop sa media:
•Di ganahan si Binay nga pasigaon sa TV cameramen ang mga suga sa ilang mga camera atol sa pag-interview sa ilang reporters niya, bisan unsa kangitngit sa palibot; ug
•Labihan kahingasaba ni Roxas sa iyang kuyog nga mga kawani kon masayop sa ilang trabaho sama sa pagkahibilin sa ilang sakyanan sa mga dokumento nga iyang gikinahanglan ug labihan niya kasaputon kon pangutan-on sa mga sakop sa media og mga pangutana nga di niya ganahan.
***
Way nangahas pagpangutana ni Binay nganong di siya ganahan nga magsiga ang mga suga sa TV cameras. Igo rang nangagpas ang cameramen nga tingali may labot sa iyang katabunon. O mahimong, sama ni Bono sa U2 nga karon rang bag-o nipasabot nganong nagsige og sunglasses, may kakulian lang ang iyang mga mata.
Nabiktima ko sa kasaputon ni Roxas sa iyang pagduaw sa Sugbo niadtong Huwebes. Wa na siya ganahing nanubag og mga pangutana dihang akong gikuhaan og reaksiyon sa pasangil sa kampo ni Binay nga siya ang utok sa Oplan Stop Nognog in 2016. Mahimong di kamaong motago sa iyang sapot o wa lay pailob sa giisip niyang way kapuslanang mga pangutana.
***
Maong, bisan sa pagdupa ni Bohol Governor Edgar Chatto, katuohan ang pasangil sa mga mayor nga gikasab-an silang Roxas sa kalangay sa program of works and estimates (POWE) pagpabarug sa mga munisipyo ug ubang istruktura nga naguba sa linog niadtong Oktobre 15, 2013.
Apan sa iyang pag-atubang sa Arangkada sa DYAB Abante Pa, Bisaya! niangkon si Roxas nga nakasabot siya sa kalangay kay tagsa ray inhinyero sa mga lungsod ug busa wa makaato pagpatuman sa kapin sa libo ka proyekto nga gigastohan sa Department of Interior and Local Government. Gipasalamatan niyang mga lungsod sa Sugbo nga nakahingpit na sa mga proyekto uban sa tabang ni Gobernador Junjun Davide.
***
Di ni unang higayon nga nabantang ang kasaputon ni Roxas. Nga gikabalak-an na ganing nakaapektar sa pagtuman sa iyang trabaho. Sama sa laksot nilang away ni Tacloban City Mayor Alfred Romualdez taliwa sa dinaliang panginahanglan pagtabang sa mga biktima sa bagyong Yolanda. Si Presidente Noynoy Aquino, nga gidungog sang saputon, mao na hinuoy nihapsay sa relasyon ubang Romualdez.
Apan ang kasaputon ni Roxas di ikatandi sa mas grabeng pasangil sa pangurakot batok ni Binay. Ang kamasuk-anon sa mga tubag ni Roxas sa Oplan Nognog wa ra sa kumingking sa paugat nga paglikay ni Binay pagtarung og tubag sa mga pasangil sa ilegal nga katigayonan batok niya ug sa mga sakop sa iyang pamilya. [email protected]
- Latest
